現年34歲、已育有一女的鍾嘉欣昨公布誕下接近8磅重的男B，湊成「好」字！今次在加拿大分娩最特別之處，便是她選擇了在家中分娩，可謂圈中第一人！她自言很幸運地找到一班很好的助產士幫手，令生產過程十分順利！
藝人鍾嘉欣（Linda）2015年與脊醫Jeremy拉埋天窗，翌年8月22日誕下女兒Kelly，今年三月公布再度有喜，上月廿四日有傳她已經生咗，不過一直未經Linda證實，直至昨日，她終於親自在社交網公布喜訊，於加拿大誕下接近8磅重的兒子，為脊醫老公Jeremy湊個「好」字！
手仔放面珠賣萌
她昨透過短訊錄音，語帶喜悅跟大家分享好消息，指囝囝同現年兩歲的大女Kelly好似樣：「大家好，好開心今日同大家宣布，我啱啱生咗個仔，好健康，佢個名叫Jared Anthony，佢都算係一個大B，出世有7磅14安士重，有好多、好多頭髮，同埋好似好似家姐Kelly，全家講笑話我好似生咗龍鳳胎，因為Jared同Kelly真係好似樣。」嘉欣更特登發布了囝囝同女兒的照片作比照，兒子Jared五官生得標致，大鼻似足爸爸，更識將手仔放在面珠賣萌！
嘉欣透露今次分娩最特別之處，便是選擇了在家中分娩，過程雖然好痛但很順利，Linda表示：「今次生產好順利，順產，好痛、好痛，最特別選擇咗喺屋企生，因為加拿大好支持Natural Delivery（自然分娩），我好感恩、好幸運，搵到一班好好嘅助產士，佢哋畀咗好多Emotion Support（情緒支援）我，仲有好多Personal Competencies（靠個人能力）嘅技術、方法，令生B過程更安全。佢哋教我去聽自己Body去生B，絕對係一個好難忘嘅經歷，同個仔一齊、同我嘅Family一齊。」
圈中好友送祝福
屋企喜獲新成員，但Linda直言不會因此而忽略囡囡：「依家我休養期間，要坐月、要照顧好個仔，同埋好緊要，要照顧家姐Kelly，因為呢個時間，始終突然多咗個BB，要放番多啲時間喺Kelly身上，令佢覺得OK，依家我忙緊呢一樣嘢，希望好快可以介紹囝囝畀大家識，好希望見到大家，大家都要Take care，好多謝所有朋友、觀眾、傳媒支持同祝福，唔講咁多住，我都要瞓覺喇！」
Linda公布喜訊後，不少圈中好友如楊怡、馬浚偉、黃智雯、陳敏之、宋熙年等亦紛紛在社交網恭賀她，而嘉欣亦有一一回覆，心情靚爆！
更多新聞，請瀏覽東方日報網頁：
http://orientaldaily.on.cc/
|
鍾意就快D Share啦！
|
|
|