都話高手在民間，讀者周太移民美國多年，上個月佢同丈夫返香港見婆婆最後一面之後就出街行吓；上個月25號星期六，周太喺尖沙嘴搭的士過海去中環大館參觀，遇上的士歌神自彈自唱，佢聽返啲舊歌勾起唔少昔日回憶，呢程車令佢度過咗開心嘅時光。
周太話，佢一上車聽到姓何嘅的士大哥播緊譚詠麟啲歌，佢隔籬嘅乘客位放咗個Ukulele夏威夷小結他，周太問佢係咪識彈結他，的士大哥話佢後生夾band嘅，彈咗幾十年，佢慨嘆：「香港冇晒音樂㗎喇，人哋醒嗰啲都係去外國讀音樂，我哋要搵食咪揸的士囉！」
為林鄭作曲《香港老鼠多》
喺隧道口塞車等候嗰陣，佢自彈自唱許冠傑其中一首名曲《鬼馬雙星》娛樂吓周太兩夫婦，哼咗幾句就開車。到咗目的地，周太又問佢仲有乜嘢飲歌，佢就話：「呢隻唱畀林鄭月娥聽，我作嘅，叫做《香港老鼠多》」，的士大哥好投入，身體跟住節拍擺動邊彈邊唱：「香港老鼠多，見到老鼠嚇死我，老鼠多到一籮籮，嚇死林鄭月娥！」周太聽得好開心，佢老公唔識聽中文都覺得好得意。
今次返嚟香港，周太話好少遇到好嘅的士司機，佢第一日落機去探婆婆，第二日婆婆就過咗身，佢飛的去醫院見婆婆最後一面，「我上咗架的士，個的士司機同我講約咗人食飯，唔車我去，我求佢佢都話唔得，我覺得好冇人情味。」不過，之後佢遇到何大哥肯車佢過海，仲私人獻技，大讚佢好好人。
呢位的士歌神3年前已經試過俾人拍片擺上網，當時佢喺的士入面攞住Ukulele示範畀乘客睇點樣掃chord，又唱許冠傑80年代名曲《半斤八両》獲網民激讚，有人甚至打探點樣可以撞到的士歌神。以前有個的士司機夏金城，好鍾意作曲同唱歌，仲自資出碟，包括1991年推出嘅《為了靚靚》同《夏金城98作品集》，唔通的士司機專出歌神嘅？
你敢爆，我敢獎！ 立即WhatsApp《蘋果》24小時爆相爆片熱線或致電：63836568
|
鍾意就快D Share啦！
|
|
|