俗語有云：上得山多終遇虎，但今時唔同往日，而家即使好日唔上山，睇怕隨時都會遇到野豬。好似啱啱過咗嘅星期日下晝咁，有市民就喺香港仔上山燒烤嘅時候，遇到野豬走埋嚟搵食，真係「巧京京」，似乎野豬嘅數目真係多得好緊要。
鄭小姐嗰日喺香港仔水塘燒烤，當時有4枱人用緊燒烤爐燒緊嘢食，都好多人好熱鬧。不過就喺佢哋燒到㷫烚烚嘅時候，突然有一隻大野豬走埋嚟摷嘢食。鄭小姐話隻野豬超級大隻，「佢完全唔驚人，仲好淡定咁慢慢走埋嚟，應該食慣咗。」鄭小姐同朋友見到咁，梗係行遠少少先啦。
隻大野豬走埋嚟之後，就識得直接走埋去張凳度，先食凳上面啲食物，之後佢就老實唔客氣，直情擒上張凳上面摷枱面嘅食物，仲咬住張枱布扯落地。有嚿莎莉蛋糕就係咁跌咗落地，點知隻大野豬就一口將件蛋糕食埋，認真大件夾抵食。當隻大野豬掃晒呢邊啲食物之後，仍然未夠喉，於是走去隔籬枱繼續食。
鄭小姐話隻大野豬喺現場食咗起碼半粒鐘，「掃晒4枱食物，每枱佢都慢慢食，好似莎莉蛋糕、牛扒、番薯，仲有隔籬枱外傭姐姐啲糯米飯，統統都俾佢掃晒。總之留得低喺枱面、凳上啲（食物）都掃晒，佢見垃圾膠袋有元貝殼，都扯開膠袋睇吓有冇嘢食！」現場各人睇到眼都凸，但就冇人敢去趕走隻大野豬。鄭小姐話好多人喺度同隻大野豬影相，有個爸爸仲抱住個5、6歲嘅小朋友同隻大野豬影相，另外有外傭姐姐仲想掹隻大野豬條尾，大家似乎都唔算好驚。不過，鄭小姐話自己就好驚嘞，始終野豬有攻擊性，仲污糟可能帶有細菌。鄭小姐又話以前都有喺香港仔水塘燒烤，亦知道香港仔有野豬出沒，但從未試過好似今次咁，咁近見到隻咁大隻嘅野豬喎。
|
鍾意就快D Share啦！
|
|
|
