郭政鴻喺電視圈打滾三十年，忠心效力同一公司，但面對公司改朝換代，大量舊有班底都相繼劈炮，幾年前佢決心離巢外闖，接連拍咗幾套網劇又北上搵外快，比起以前日捱夜捱嘅工作量，鴻仔話現時係「休差」，更現實嘅喜訊係現時收入比以前豐厚，多咗時間顧及家庭對住一對寶貝女，搵到真正嘅生活，又有充裕時間鍛鍊體格操Fit，驅使快將54歲嘅佢更添男人味。
近日喺「黃Viu煲劇網站」推出嘅新劇《蝕日風暴》，集結中港台演員參與，鴻仔係其中一個警察角色，戲份集中與張智霖同薛凱琪追捕黑警，有唔少槍戰追捕場面，合作班底及台前幕後都係舊同事，監製係前大台高層梁家樹(Tommy)，有成班義氣仔女呼應。今時唔同往日，效力第二個平台，鴻仔坦承拍攝氣氛有所不同，喜歡現時呢種挑戰：「出面拍攝資源多啲，香港同大陸合拍，網劇題材可以更大膽，去得更盡，資源夠又可認真啲。」
話晒都叫做倒戈，不過鴻仔唔怕方仗小器，佢話：「之前拍咗啲劇無綫都有買返嚟播，天下無不散之筵席，大家都係一個舊公司有感情，呢個年代唔會發生咁嘅事。」回想當時離巢，鴻仔話：「就好似小朋友變成結咗婚嘅男人，去到樽頸位要改變，再行落去難以見識出面世界，地球都係圓，好多同事兜個圈又返去。」離開共事三十年老主顧並無後悔：「冇法，好多同事都離開，近年不斷換血，好多相熟監製同事都相繼離開呢個平台，又多新人上緊嚟，我覺得係時候出去見識下，唔通過多十年先出去咩。」
時至今日，証明鴻仔踏出呢一步絕對正確，單計收入同時間已經賺返，佢話：「相對輕鬆咗，舊公司一部接一部，反而出面一年拍一兩部，多咗時間陪屋企，小朋友仲細，如果要長時間拍嘢會錯過好多，生活開心咗，見識多咗，有時間做自己嘢，又可以鍛鍊身體，細個時學武術，入咗無綫後只係拍劇，冇時間練習，近年有返自己，真真正正係一個生活。」呢幾年都好滿意工作及作息狀態，勝在商演多搵快錢，鴻仔好坦白話：「喺無綫就難有呢個機會，拍劇lock晒期，以劇組為重，全世界要就劇組時間，我哋冇可能搵到所謂外快。」相反現時一個月有幾單商演，收入和味，鴻仔慶幸脫苦海：「係一份休差，自己唔少劇集喺大陸播，有少少基礎，『知樣度』算高，去到多數週年晚宴，同嘉賓影相簽名，唱幾首歌，工作範疇就係咁多，你話係咪休差，同拍戲日曬雨淋三十幾度，唔好話著古裝，叫你著西裝戶外企一日拍外景，香港夏天三十度你知咩味道，唔好講室內工作量或講對白，你企住都暈得一陣陣。」
大台自製港劇成績早被超越，鴻仔認同大陸劇集製作質素高，佢話：「大陸人睇港劇唔同以前，只揀警匪片，第二啲戲種已經唔得，古裝、歷史人哋仲靚，個個『小鮮肉』，卧底戲咁多年都受歡迎，佢哋就係鍾意呢種港味。」鴻仔同一眾離巢之人想法雷同，捱過無數個夜晚，試過連踩三套劇人都枯，但佢都同娘家有感情，若有機會都會合作，但模式會改變，仲指出大台常搵外援，但又如何呢，曾是大台愛將嘅張衛健都念舊返娘家做外援，可惜主演重頭劇《大帥哥》都變炮灰，鴻仔話唔知內情，做演員做本份拍完就算。
事業家庭兩如意，鴻仔現時育有兩愛女，講到兩位小情人分別係九歲大女郭倩欣（Kaley）及七歲幼女郭詠之（Ashley），鴻仔即一副慈父相，平日主力由太太負責家庭，佢會爭取時間和囡囡相處，教導佢哋，好彩近年際遇都係接拍中港合拍作品，並以香港為背景主題，所以唔使離港太耐，在家庭方平得以平衡。
場地提無:The One 鐵板燒海賀
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
