內地第24屆華鼎獎下個月9號喺香港亞洲博覽館舉行，噚日大會就公佈入圍名單（見附表），佘詩曼憑大熱劇集《延禧攻略》嘅「嫻妃」一角，入圍角逐電視劇最佳女配角，劇中同阿佘有唔少對手戲嘅「魏瓔珞」吳謹言，就獲提名古裝題材電視劇最佳女演員。
無綫大製作劇集《再創世紀》，雖然喺內地嘅口碑同收視都一般，首播收睇人數只有0.379%，但主演嘅郭晉安同周勵淇分別獲提名當代題材電視劇最佳男、女演員，而郭晉安將會同另一位港星陳偉霆爭獎。周勵淇有份入圍，好開心話：「多謝晒大家，我會繼續努力。」至於無綫另一小生陳豪就憑《使徒行者2》提名電視劇最佳男配角。
想多啲人識
驚喜方面，有陳家樂憑《東方華爾街》入圍最佳新銳演員，今年初佢憑無綫劇集《逆緣》多咗人識，𠵱家再有機會開拓內地市場。陳家樂對於入圍新銳演員，佢坦白話好驚喜：「好開心有份提名，因為呢次提名，好似畀咗我喺過去呢一年工作上面嘅一個肯定，好多謝華鼎獎嘅評委選我入去。」佢仲話攞唔攞到獎就隨緣，最緊要係多啲人識自己。華鼎獎各獎項候選名單全部由網友投票，加埋華鼎獎演藝名人評選委員會評選結果同在線投票、簡訊投票而得出獲獎名單。
撰文：馮仁昭
|
鍾意就快D Share啦！
|
|
|
