現年51歲嘅江欣燕，13年突然同結咗婚12年嘅吳積遜離婚，再見亦是朋友。
離婚後，欣欣爸爸叫欣欣搬返娘家一齊住，共享天倫樂，16年，欣欣爸爸病逝，佢接受訪問時話好開心搬返屋企同父母住：「我覺得呢個決定好啱，因為喺爹哋嘅晚年，我返去同佢好sweet過咗最後嘅兩三年。」
爸爸離開咗，剩番79歲嘅媽咪，一向出名孝順嘅欣欣，最鍾意陪媽咪四圍去。
呢日，壹仔喺時代廣場撞到欣欣陪媽咪行街，雖然近年拍少咗好多劇，但仍然有唔少人認得佢，仲同hi添！
仲有一個月就到聖誕節，欣欣呢日原來同媽咪一齊揀聖誕節裝飾，好warm呀！
兩母女各有各揀，揀完由欣欣負責俾錢，呢個時候，佢哋撞到個朋友，吹咗一陣水後離開。
雖然欣欣50有1，但係素顏樣亦見得吓人，keep到喎！
欣欣媽咪曾經喺訪問時提到，兩個女愛情都唔順利，佢好自責：「我唔係好叻、好識做媽咪嘅人！其實睇到佢哋開心我就開心，最擔心佢哋有唔開心，我做媽媽唔識做啲乜，盡量唔好同佢哋提啲煩嘅嘢，為咗令佢哋開心，我會做好自己多啲。」
愛女深切嘅佢，曾經話過會幫女兒擋子彈，「如果子彈嚟嘅時候，我真係會企喺你（欣欣）前面。」
媽咪願意為自己擋子彈，欣欣講過：「你俾咗條命我喇，你嗰條我唔要呀！唔好擔心咁多嘢，好榮幸喺你健康時，有機會照顧你，你健康多啲，開心啲！」
79歲嘅媽咪健康快樂，係欣欣最開心嘅事。
攝錄：陳亦龍
立即下載Apps，隨時隨地睇盡時政專題、深度偵查、娛樂熱話！
按此連結：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|
