叫得李修賢做「李Sir」，就知佢飾演警察深入民心。不過同以前個鐵漢柔情look比，畢竟而家已經66歲喇，有個肚腩仔之餘，頭髮都花白又稀疏。唯一無變嘅，就係同老婆感情依然好好，食個車仔麵啲餸都要夾嚟夾去share嚟食。
近年李修賢主力賺人仔，好少喺香港娛圈蒲頭，所以喺街撞口撞面都真係未必認得佢架。其實唔認得仲好，難得放假返港就可以樂得清閒，輕輕鬆鬆同老婆過下二人世界，唔使俾人打擾。如果唔係，真係隨時俾班C9 fans瘋狂圍堵架，話晒以前《公僕》、《霹靂先鋒》、《喋血雙雄》入面嘅李修賢，真係型到跌渣。
李修賢當年一臉正氣，飾演警察梗係一流啦，但原來佢仲係中國影史上首個超級英雄嚟架，係咪唔講唔知呢？啟發自1970年代風靡亞洲嘅《幪面超人》，由香港邵氏電影公司炮製、倪匡編劇嘅《中國超人》，喺1975年發行，並由李修賢擔正。呢個中國超人就勁喇，火不能熔、水不能淹、雷不能殛、電不能毀，仲識得閃電拳、追魂腿、千里眼、死光刀。保護國家領土，一點都不能少，靠你喇中國超人。
來源 source: http://nextplus.nextmedia.com
|
鍾意就快D Share啦！
|
|
|
