巴士公司成日都提醒乘客行車時要小心安全，但唔係人人會聽呢支笛。好似禮拜一（19日）中午時份，就有個阿媽帶住個幾歲大嘅囡囡坐九巴270A號雙層巴士，當時佢哋坐喺上層最前排座位，其間個細路女竟然成個人瞓喺車頭擋風玻璃個窗台位，嗰位阿媽仲一路同個囡囡玩，好似好得意咁，但有其他乘客睇到咁覺得好牙煙。
涉事嗰部270A號九巴當時由上水開往尖東麼地道，目擊市民葉先生喺粉嶺站上車，佢話自己原本坐喺巴士上層後排，但係見到個細路女瞓喺車頭大銀幕個窗台位，於是就坐前去望清楚咩事。原來個阿媽同個細路女，仲有個細路女嘅爺爺同嫲嫲一行4人，坐喺最前排兩排座位，葉先生話佢哋全部都講普通話，相信係內地人嚟。
葉先生拍低咗當時事發片段，可以見到個阿媽坐喺車頭最前排左邊位，而個囡囡大約3、4歲左右，就打橫瞓喺窗台，個細路女不時擰來擰去，但個阿媽不但無叫佢唔好瞓喺度，仲不時同佢玩。葉先生話佢睇到咁覺得好危險，「好似好好玩，但有少少離譜，如果有意外或者架巴士dup一dup，真係唔知點算，個細路女隨時碌喺巴士度，甚至可能撞爆玻璃飛出去！」
整個過程維持咗半個鐘以上，葉先生話架巴士由粉嶺過咗獅子山隧道去到九龍塘窩打老道，佢哋都仍然係咁。不過葉先生當時就無當面出聲斥責對方，佢話「有時啲嘢忠言逆耳」，怕對方未必接受仲起爭執添，惟有拍片希望大家睇到會有所警惕。
九巴發言人回覆查詢時表示，九巴重視安全，指示車長留意車廂內乘客的動態，並呼籲乘客妥善照顧同行小孩。根據《乘客須知》，車長為保障車內乘客及行車安全，有權向乘客發出為公眾安全著想的指示。
你敢爆，我敢獎！ 立即WhatsApp《蘋果》24小時爆相爆片熱線或致電：63836568
|
鍾意就快D Share啦！
|
|
|
