歌手泳兒（Vincy）日前喺自己社交網站上載咗一條片，一開始，Vincy着住婚紗、又帶戒指、男主角個長髮背脊，似十足髮型師男友Ziv，對白又一生一世又承諾，唔知以為佢宣佈結婚。原來佢係為咗宣傳自己品牌而拍嘅一條宣傳片。
最近，Vincy成立咗個人品牌，佢話呢個品牌名係來自一張greeting card，「話說有一日喺度懊惱緊啲嘢，決定出街行個圈透吓氣。喺間giftshop嗰度，見到一張greeting card寫住『You got this！』所以就用咗做個brand name。」佢仲話呢品牌係代表俾啲信心自己，做啲自己想做嘅事，希望為自己同埋其他人打打氣。
品牌第一個campaign就係慈善義賣「狗狗頸圍」。今次Vincy自資製作咗一系列嘅狗狗頸圍，目的係宣揚「Make a promise, love them a lifetime.」呢個message。Vincy話：「婚姻係一個一生一世嘅承諾；養寵物都一樣，俾佢哋一輩子嘅承諾。希望帶上呢個頸圍就好似戴上結婚戒指一樣，承諾照顧佢哋一輩子。」呢個狗狗頸圍除咗可以喺SPCA Christmas catalog買到，亦都可以上「v.got.this」lG查詢，所有嘅收益扣除成本後將捐給動物慈善機構。而今次首批限量版「make a promise狗狗慈善頸圍」嘅收益將會捐俾SPCA。
原來啲狗狗頸圍係Vincy親手製作，佢話：「第一次整手作仔賣，揀料都係自己嚟，主要用料係Japanese Organza (日本柯根紗) 同埋Japanese Chiffon ribbon（日本雪紡紗帶絲帶）。都有俾唔同嘅狗仔試，希望佢哋帶得舒服又靚。」拍攝宣傳片時，Vincy話最難係控制係自己兩隻狗仔，「Batman唔受控、辣妹要用嘢食引誘。其實拍攝嗰日都有啲熱，再加埋地面有熱氣，但係佢兩隻嘢好醒目，影相時時識得爬上婚紗抖涼。」除此之外，Vincy亦都多謝一班好朋友幫手，「我哋朝早七點就開始拍，因為要追日光，大家嗰日都輪流變做狗保母。」佢仲話希望可以多啲司機肯接送啲狗，「因為嗰日call車轉location有啲難，好多司機見到狗狗就擰晒頭。」真係陰公。
來源 source: http://nextplus.nextmedia.com
|
鍾意就快D Share啦！
|
|
|