鄭嘉穎與太太陳凱琳（Grace）上周四宣佈成功造人，昨日兩人分途出席活動。Grace開心爆老公以往時常叫錯她做「陳慧琳」，初次懷孕的她坦言，變得情緒容易波動又易喊，她笑說嘉穎一向視她為公主：「好彩我未係太野蠻。」嘉穎就遵從Grace吩咐，封口不談BB，交給愛妻親身回答。
現年49歲的鄭嘉穎與27歲的陳凱琳剛於8月在峇里島完婚，才過三個多月，上周四就火速公佈造人成功。昨日鄭嘉穎及陳凱琳分別現身，Grace與陳慧琳（Kelly）到尖沙嘴出席香水活動，剛懷孕的Grace身穿4吋高踭鞋及白色露肩連身褲，雖然上半身有一朵大白花，但仍見她腹部微隆。
心情興奮的Grace，大爆嘉穎當年追她的瘀事：「初初拍拖，嘉穎叫我做『陳慧琳』，叫到第三次，我同佢講我叫『陳凱琳』，佢間中會叫我中文名，呢件事有同Kelly講番。」Grace自爆陀B心情既興奮又有壓力：「我希望每日嘅心情都keep住好，因為有時心情會波動，我要搵方法減壓。」Grace因懷孕變得情緒化，看卡通片見到有少少感動位都會落淚：「佢（鄭嘉穎）好冷靜話係正常，佢覺得大肚係應該有情緒波動，佢仲叫我記住呢刻，對將來演戲有用。」
上圍升Cup已見肚
幸好現在嘉穎對她更體貼，Grace冧爆說：「以前係公主，𠵱家佢更加細心同體貼，好彩我未係太野蠻，我唔會半夜2、3點要人買嘢食，我怕要還。」不過Grace的飲食習慣就大為改變：「我以前鍾意食甜，𠵱家鍾意食鹹同中菜，可能BB想要多啲營養。」吃多了自然長肉，Grace坦承有升cup：「我𠵱家出街，都會好敏感人哋望住我條腰同嗰度（胸）。其實開始見肚，可能我偏瘦，所以一有肚腩會好覺，都幾得意，因為個肚好硬淨。」
早前黃智賢透露，Grace照超聲波時，嘉穎因看到BB臍帶而興奮大叫：「嘩！咁大條嘅！」Grace笑說：「係呀，照嘅時候，我望一望老公，可唔可以唔好講出口呀，不過幾得意，我知佢會同朋友分享，男人同男人之間會覺得好笑，所以黃智賢咁講，我唔出奇。」她又表示已經知道BB性別，但想稍後才公佈。Grace直認已懷孕逾3個月，對被指是奉子成婚，Grace拒答：「呢啲唔講喇，預產期要同醫生夾吓，始終係第一胎，我未知開刀定順產。」為方便家人照顧 ，Grace打算於香港生B，至於BB的名字，中文名會交由長輩命名，而她就負責改英文名。
開心過中六合彩
至於準爸爸鄭嘉穎昨日則於新蒲崗宣傳新片，心情大靚的他坦言驚講錯說話：「心情開心過攞獎同中六合彩，好喜悅，非筆墨能形容。太太叫我唔好講咁多關於BB嘅嘢，佢比較緊張，大家問番佢。」嘉穎坦言第一次從超聲波看到BB，是一個難忘經歷，而他也有向身邊朋友取經。至於BB是否男仔？嘉穎說：「你問我太太啦，佢叫我唔好講咁多。」他只肯透露實際預產期是豬年，並已計劃攞假陪太太生產，屆時應會入產房。
採訪：陳慧安、卓寶花
攝影：黃曉妍、陳俊強
|
鍾意就快D Share啦！
|
|
|