一代武俠小說泰斗金庸查良鏞上月底離世，享年94歲。查良鏞的喪禮將於下周二舉行，翌日出殯，據知遺體將進行火化。
金庸小說筆下人物，除主角會精忠報國（韋小寶除外）、捨己為人的道德底線外，其餘角色不乏風流人物。《射鵰英雄傳》中的東邪黃藥師，可算當中表表者，他離經叛道，崇尚晉人遺風，所以有「邪」的稱號。在眾多代扮演過黃藥師的藝人中，駱應鈞演的東邪，盡得放浪形骸及狂的精髓，可謂一絕。
人稱「駱Sir」嘅駱應鈞邵氏年代出身，入行逾40年，係名副其實嘅老戲骨。不過，駱Sir已經有一段時間冇喺公仔箱出現，唔係因為退休，而係駱Sir喺2011年離開大台後過檔港視(HKTV)，可惜港視不獲發牌，演出嘅劇集無緣喺免費電視頻道播放。
駱Sir話﹕「冇失望，當初4揀2已經知道機會最渺茫，睇到佢點搬龍門，唔係點會搞到香港撕裂。」駱Sir認為係前屆政府曾蔭權與上屆政府梁振英之間嘅問題，佢話﹕「曾蔭權唔想剩係畀大氣電波鴻圖，就想發多啲免費牌，嘗試搵潛在有可能會做嘅人，嗰陣王維基畀佢講完心郁郁，基本上大家都知發牌一定唔係問題，因為吃力不討好，做電視大家都知係『十蝕一賺』咁濟，咁都會有儍佬肯做，點會有可能唔畀牌佢？！點知真係唔畀，最後咪搞到亞視出醜，一路唔拔喉，呢啲嘢全部都係政府做㗎嘛！」
駱Sir越講越唔順氣，繼續鬧爆﹕「唔發牌畀佢係因為可能個市場承受唔到咁多，我唔想佢蝕錢。關你咩事？商業社會，依家街上有條友話用500萬租個舖，唔通你話唔租呀？怕你蝕？唔係咁樣嘛，不嬲香港嘅遊戲規則唔係咁，但佢就係將個遊戲規則改變咗。」
駱Sir坦言當初冇諗過簽王維基，因為王維基挖角前，佢已經離開咗大台近一年。即使無綫搞「召回家」呼喚舊同事回巢，駱Sir都好堅決咁話﹕「唔會喇，唔會返去嗰邊，o依家適應咗自顧生涯。」問到如果有好好嘅劇本同角色呢？駱Sir笑笑口話﹕「你覺得好正嘅，可能我唔係覺得咁正嘛。同埋我點捱嗰種通告……我解釋詳細少少，例如你係主角，今日15場，但我係配角，佔你1/3啫，但喺15場係1、3、9、10、15，得4、5場都『揼』咁耐時間，慣例主角第二朝唔使開第一場，畀佢唞一、兩粒鐘，咁其他人去攝，呢個情況配角多數又中梗，咁大家辛苦程度唔會差好遠。」
駱Sir透露大台搵過佢4、5次，佢一臉自信咁話﹕「據聞當初(召回家)剩係開兩個名，我係其中一個。」駱Sir話喺無綫多年，己睇通潛在規則點玩，佢話﹕「我哋太熟個制度，邊啲可以做邊啲唔可以做，邊啲聽咗唔可以當真，邊啲可以當真。有時個監製話搵你演，但佢上面仲有上司，變咗完全冇刺激、冇新鮮感，樣樣事已知就唔好玩。」駱Sir話04年廖啟智離巢，令佢好羨慕，但當時自己未做好安全網，擔心一走零收入，或者要做比大台條件更差嘅工作，最後仍要向現實低頭，佢慨嘆﹕「但我唔想咁。」
駱Sir話邵逸夫年代嘅無綫最好玩，以前可以任意改劇本，甚至角色，佢話﹕「以前自由度大啲，好似當年吳孟達拍《新紮師兄》，原本set咗角色係老差骨，hea住做唔起勁，但佢唔鍾意，自己設計到好有威嚴，換轉o依家？拍完第一日就照肺問你『點解咁呀？再咁我哋換人喇喎！』紀律上咁做梗係唔啱，私下將人哋心血改晒，但都要睇效果，真係好睇上面又buy就可以繼續去。」時代轉變，年輕一代有時唔識尊師重道亦令佢萬般感嘆，佢話﹕「係大陸拍嘢，人哋會叫聲你『老師』，但香港就唔可以擺個『老屎忽』款出嚟，因為冇人會appreciate(欣賞)你做得咁耐，尤其後生仔，咁當然未必個個都係。」駱Sir覺得係無綫做8至10年係最好嘅，周潤發係一個好榜樣，問到多年來有冇諗過要做主角？佢話﹕「我又冇，有啲人恨，因為當時佢哋抱住嘅觀念，只有做主角先有優待同人工高啲，但o依家新人出嚟，就算你做主角，可能都係全組人工最低嗰個，我份人比較實際，唔會幻想。(邊個角色最滿意？)未有住，我份人過咗去就算，但我拍戲好少失手，會加少少嘢令到個角色冇咁悶。」但如果剩記角色，唔記得駱應鈞又會唔會好失望？佢話﹕「都慣咗，人哋能夠記得你戲入面角色應該好感恩，好過有啲人面目模糊到乜都唔記得，咁諗會舒服啲。」
今年65歲嘅駱Sir，已經可以攞生果金，不過駱Sir個樣真係一啲都唔似，佢好自信咁話﹕「拍《Z風暴》時，我演許仕仁年紀嘅角色，導演要求我掃(化)老妝，話『你個樣後生呀！』。其實我幾鍾意人叫我駱Sir，但又有個心結，因為一般警務人員55歲就要退休，警務處長都只可以延至57歲，覺得好似冇乜說服力……之前維基寫咗我63歲，我仲自己改番啱，哈哈。」相信唔少人都知，駱Sir嘅爸爸係小學校長，叔父係著名粵語片演員駱恭，而大家姐係香港信報創辦人駱友梅女士(亦即被譽為「香港第一健筆」林山木嘅太太)，弟弟就係資深大律師駱應淦，不過駱Sir一向都好少提屋企人，佢解釋﹕「我係舊式人，一來唔想抽佢哋水，二來想保障佢哋私隱。」
現在駱Sir主力返大陸拍網絡電影，但佢堅持講廣東話，駱Sir解釋：「我堅持㗎，如果用普通話講台詞，會打亂我(演戲)節奏。其實我溝通冇問題，但講得唔流利(普通話)，好多人差過我一萬倍，難怪o依家都少搵香港演員。」
場地提供﹕China Tang@尖沙嘴
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
