【新增影片】
麥浚龍（Juno）同謝安琪（Kay）喺會展為拉闊音樂會進行演出，喺音樂會尾聲，台上播放咗古天樂赤裸剃鬚嘅片段同歌聲做彩蛋，完騷後Juno解釋係今日將派台嘅新歌片段，不過就賣關子唔肯透露詳情。
今日謎底終於解開，原來Juno同Kay嘅年度企劃，概念如電影，以董折、浦銘心兩個角色貫穿所有歌曲及MV，今次邀請咗古天樂演出Kay嘅第二任丈夫——藍定凌，有一段極長間冇推出新歌嘅古仔，今次仲會破天荒同Kay合唱《（一個男人）一個女人和浴室》。
聽講今次古仔之所以重出樂壇開金口再唱歌，係因為Juno同古仔合作拍電影《風林火山》而成為好友，古仔話：「我好欣賞Juno嘅細心，我哋喺電影上嘅理念好相似，大家都好願意花時間去做電影。我唔擅長唱歌，但《一個男人》唔單係首流行曲，係整個故事嘅一部分，一個回憶，我以藍定凌嘅身份去唱，係一個表演，有劇情，感覺好似一部電影，所以我試，我都好期待將來有機會拍成電影。」
古仔同阿Kay都話覺得今次合作好有趣，阿Kay話：「今次以大家角色出發去唱歌，同以前嘅合唱歌好唔同，唔再係單純演繹一首單曲，成個角色係有情緒，我相信大家聽完之後，都想有個咁好嘅老公。」
阿Kay仲話要同古仔一齊登台，古仔即耍手：「做乜嘢都得，唔好要我唱live，呢首歌歌詞句句唔同，冇重複，我揸起支咪已有壓力喇。」Kay笑笑口話：「可能你之後又覺得好喜歡呢首歌，好想現場唱俾觀眾聽呢。」
精選娛聞，喺晒《娛果》
http://fb.com/appledailyent
| 阿Kay話睇完呢個《（一個男人）一個女人和浴室》MV之後，大家都想有一個好似古仔嘅老公！ | | |
|
鍾意就快D Share啦！
|
|
|
