在舞台劇界的資深演員兼導演的袁富華（Ben），可能大家對他不太熟悉，但說起《喜劇之王》中演反派的他，踢爆周星爺一幕，尤其他在戲中說︰「你唔係外賣仔。」最為人熟悉。不過「外賣仔」之後，應該大家會叫他新名字「打鈴哥」。
憑新戲《翠絲》中飾演過氣花旦打鈴哥，在今屆金馬獎奪「最佳男配角」的袁富華，早前在觀塘接受《蘋果》專訪。當初演這個從骨子裡散發媚態的男人，Ben曾有掙扎過，「我喺舞台上都演過好多唔同嘅女人，今次監製舒琪揾我時，我吓咗一聲，我唔係介意做女人，而係花旦唱子喉，我自己係唱平喉，知自己係唱唔到，但佢話戲你一定做到，唱就搵人代唱。」
要演一名擁有男人身女兒心的跨性別人士，Ben先從心態上多做功課，「我覺得呢個角色好可憐，嗰個年代男人身女兒心，點解打鈴哥去學戲做花旦，因為扮女人時佢最開心，心靈上有所慰藉。」其中一場化身女人的戲份，令Ben最深印象，「我閉上眼俾佢哋化妝，當我琤開眼時攞到個感覺，好自然咁流露出嚟。」
Ben演繹戲中的打鈴哥，甚有已故資深藝人江毅的影子，Ben大方說︰「係，其實係有，江毅叔係我嘅啟蒙老師，但佢唔知。我細個時，媽媽帶我去利舞台睇話劇《橫街窄巷》，佢係演花旦，令我好深印象。當時窮苦大眾用5元去睇戲，只係山頂位，係好奢侈，唔係成日有機會去睇。後來我有機會拍電影《D時，佢演地主會四大巨頭之一，我有機會同佢合作，嗰時同佢好好傾，大家好多嘢講，當時佢問我，幾時有導演或演出舞台劇，佢會嚟睇。」說起這位前輩，感情的Ben哥一度哽咽眼紅紅，「冇諗住扮佢，可能細個睇佢嘅戲，潛藏咗嘅嘢，o依家攞番出嚟，喺呢度真係要多謝江毅叔…。其實佢好可愛，喺佢離世前，我有機會同佢合作過，呢個係緣份，可以話係對前輩致敬。」
他不僅與前輩江毅結下不解之緣，從他媽媽帶他看話劇後，亦將演戲成為他終身職業，「最初我係加入業餘劇社，覺得好得意好好玩，之後加入劇團，無論我有幾唔開心，我喺舞台上演戲我就開心，那怕只係一個小角色，我都好享受，因為我鍾意演戲。」
回想童年艱難日子，Ben中學時要半工讀才完成學業，「細個屋企環境好辛苦，我爸爸係做苦力，媽媽做清潔唔識字，嗰時屋企講明考唔到上中學就冇，我兩個哥哥都冇讀，只有我同妹妹上到中三，而中四後要交學費。嗰時我跟同學去港澳碼頭買T恤、翻版帶，都幾好夠交學費同零用。」Ben哥深信知識改變命運，事實上他的努力，於2011年獲演藝學院破例讓他修讀藝術碩士（導演）課程，「演員係維生，但導演係可以講故事，我嘅畢業論文就係講憑演員經驗點樣成為導演。」
年過50的Ben仍是單身，但他有一位感情穩定的圈外女友，「我哋拍咗拖好多年，我未做演員大家已經識，咁多年佢默默支持我，我有咩諗法完全瞞唔到佢，真係知我莫若佢。（為何未結婚？）過咗時機，大家都認定咗一齊，不過我都覺得係時候做啲嘢，真係俾我諗諗。」若果Ben在金馬獎中獲獎，到時真是喜上加喜。
採訪︰羅婉玲
攝錄︰馮嘉銘
化妝、髮型︰黃德燕@Sandy Image
精選娛聞，喺晒《娛果》 http://fb.com/appledailyent
|
鍾意就快D Share啦！
|
|
|