阿感今日喺香港補擺酒，要過五關斬六將呀！
無綫38歲藝人黎國輝（阿感）同台灣老婆YoYo今日喺香港補擺酒，一早新娘子就喺Instagram上載靚靚自拍，兩人仲跟足傳統着上中式禮服，而兄弟團就有袁文傑、羅天宇及細佬胡㻗、孖仔周志文及周志康等，玩新郎環節時仲喺facebook直播添！
一班兄弟同新郎齊齊頭笠絲襪，變咗隻蜘蛛連為一體，又玩「人形蜈蚣」鬥快除Bra，仲要飲苦茶，夠晒「重口味」，不過相對要用wasabi刷牙相信班姊妹已經好留手喇！而最後阿感就要Rap「愛的宣言」向老婆示愛，真係過五關斬六將終於抱得美人歸！！雖然一對新人已經喺台灣註咗冊，但阿感都非常緊張仲手震添！新郎又向新娘跪地獻花，兩人仲咀到拗晒腰，氣氛熱鬧又充滿愛呀！
而阿感接受東網訪問時表示好輕鬆，因為有「最Hea」兄弟團！講到開門利是，佢就準備咗兩封，點知姊妹就揀中得10蚊港幣嗰封，不過點會放過佢哋呀，所以阿感就補上另一封台幣大利是！至於金器，阿感就透露媽媽送咗兩對龍鳳鈪同一隻金豬畀新抱仔！
來源 source: http://hk.on.cc
|
鍾意就快D Share啦！
|
|
|
