星夢歌手「木偶哥」林師傑與無綫咪神歐陽巧瑩昨日結婚，一對新人在婚宴前360度旋轉激咀一分鐘，師傑更緊張到全身震晒！一對新人受訪時透露想享受二人世界，暫不準備生B，實行婚後設防！
現年30歲的林師傑與26歲無綫咪神歐陽巧瑩（Tammy）拍拖近4年，終於拉埋天窗，昨日在尖沙咀The Mira筵開35席宴請親朋。一對新人在兄弟姊妹團陪伴下受訪，身穿露背婚紗的Tammy明艷照人，在傳媒要求下，與新郎師傑錫足1分鐘，之後師傑深情望住妻子講「I Love You」，然後抱抱，冧到痹！
一講嘢就喊
提到沒有接新娘，林師傑為此解說：「知大家好忙，所以今日最重要嘅環節叫『瞓晏啲』，想大家開心，屋企人都好好，唔使我哋跟足傳統。」Tammy大爆師傑很緊張，心跳得好快，甚至全身打震：「我哋拍拖4年，都冇見過佢咁緊張，攬住佢嘅時候，覺得佢成身震晒同好熱，佢話畀我聽好緊張同想喊，頭先喺場內一開始講嘢就嚟料（指喊），第一次見到佢咁，好得意，佢個樣好尷尬同手足無措，好搞笑，但我當時都有啲眼濕濕。」問到晚宴會否有表演？師傑說：「會，我寫咗首歌叫《美麗的妳》送畀太太，但只寫咗半首，因為下半世未過完，兄弟團之一譚俊彥會彈結他。」談到婚後是否不設防即生B？Tammy說：「唔想咁快做媽咪住，兩年後先，明白有仔趁嫰生，但想過吓二人世界。」
搵錢先諗生B
在旁的師傑亦贊同：「等我儲多啲錢先，依家有啲抆水。大家都喜歡小朋友，一仔一女都好正，但我事業暫時未起飛得好好，有小朋友要花好多時間陪佢哋，好似屋企人培養我一樣……」說到此處，他感觸想喊，新娘子即笑言：「好搞笑！」
一對新人於晚上8時多舉行簽字註冊儀式，換上低胸婚紗的Tammy，與林師傑完成儀式後繼續「咀不停」。之後雙方致詞，談到屋企人時，均忍不住落淚，林師傑亦感謝星夢老闆何哲圖及無綫劇《特技人》一班好兄弟尤其譚俊彥的照顧，令他很感激。
此外，陳山聰、何雁詩和楊秀惠等均有出席婚宴，問到山聰為何不與女友同來？他說：「我女友唔識佢哋，而且佢好少嚟呢啲場合。（幾時到你？）次次都會畀人問一次，暫時工作好忙，排到出年5月。（下年冇機會？）我都唔知，等上天安排。」
更多新聞，請瀏覽東方日報網頁：
http://orientaldaily.on.cc/
|
鍾意就快D Share啦！
|
|
|
