23歲高潮女Seasun（鄧思宸）係惹火定惹是非？
Seasun去年喺大台實況節目《有樓萬事足》，衝口而出「有樓有高潮」同「冇樓唔好白撞」，由零知名度變成話題人物。Seasun把握機會去接拍三級片《有罪》，賺咗片酬就「上車」，風騷做業主。首置單位僅三百呎，Seasun嘅dream house係二千呎何文田豪宅，所以佢話仲要努力再入巿，Seasun日前就喺佐敦行地產舖，睇實行情，準備隨時再「扑搥」。
Seasun睇完行情，明顯心中有數，佢接受《蘋果》專訪時直認：「近排想睇下啲樓乜嘢價位。」咁啱唔啱呀？鍾情何文田嘅Seasun答：「我都係好鍾意嗰間相連單位，有情意結。」網友揶揄Seasun買「蝸居」非「豪宅」，Seasun話：「呢間攞嚟投資，見有潛力咪買。真係太細（指手持物業），唔夠住，層樓我唔係自住，我租畀一個日本人，佢得閒返嚟住，租金好flexible，我仲要貼錢供樓。」
Seasun認定買磚頭有用，近日樓巿有下調趨勢，佢當然望到實，仲有意喺18區都買樓，第一間已喺筲箕灣插旗：「係呀18區，成條港島綫我霸晒，一區區掃落去，港島區地租真係唔同，我自己嗰區（筲箕灣）長大，揀樓要唔好離地鐵站太遠，最好係校區，或近街巿，將來自住，有個家會方便。」
Seasun呢次全靠拍咗一套三級片「上車」，日後演藝路係咪都肯繼續「賣肉」？佢話：「睇吓仲有冇其他導演賞識，其實今次第一套好大尺度，我有一場戲同女仔互動，挑釁男主角，我有全祼露點，但做足安全措施。」會唔會怕被定位，或者認為借身體做工具？Seasun話：「好睇劇本，劇情需要，我覺得性感造型係藝術，身體冇一條直線。」Seasun懶理坊間話佢拍三級片換樓，佢理直氣壯：「你用乜嘢方法賺錢，冇人理你，你去賭咪一樣，我今次（買樓）都係賭㗎，盡地一鋪過。」
拍脫戲怕唔怕男友介意？Seasun話呢排單身冇包袱：「冇拍拖，唔使諗咁長遠。」不過呢次接拍《有罪》，Seasun就話媽咪好支持：「我有同媽咪講角色要求，佢知我鍾意藝術，媽咪好開心，覺得我幾乖，肯為個家付出，又識諗上車買樓，人又幾慳，平實咗。」Seasun講講吓又「跳掣」爆金句：「做呢件事肯定好靚（指拍裸露戲），背後帶出嚟嘅訊息係咪國際化，係咪可持續，我覺得自己一年前太感情用事，後來磨練咗，拍戲反而好relax，你扮過雞，你唔係真係雞嚟，藝術高於生活實性。」
Seasun嘅金句「有樓有高潮」，街知巷聞，佢話冇後悔咁講：「當日錄影講呢句說話，你問我，梗唔係，有樓點會有高潮啫？呢句話邏輯上係搞笑，我認為樓同高潮，都會追求無窮無盡，睇住（個巿）起跌，個巿有高潮，睇到都開心啦，我想快啲有個家，想搵個人一齊住。」
自稱冇拍拖嘅Seasun，有樓後恨拍拖，「香港男仔悶悶哋，佢哋好評頭品足，成日將我哋同大陸、台灣女仔比，冇意思，我鍾意外國男仔多啲，外國男仔out going，我細個會睇邊個國家離婚率低，就揀嗰啲男仔拍拖，係愛爾蘭呀。」所以，Seasun喺17歲時，試過喺coffee shop搭訕識咗一名24歲嚟香港做實習工程師嘅愛爾蘭男朋友，大家拍拖三年。Seasun爆分手原因：「我睇到佢同第二個女仔搞嘢嘅片，佢好過份。」Seasun話同愛爾蘭舊愛拍拖，對方冇要求佢拍情慾片，「我本身覺得剝晒衫好鬼肥，根本女仔下面，冇乜嘢好睇，我一定唔會畀佢拍。」
講到擇偶條件，Seasun要求對象必須有錢有樓：「有錢，一定要㗎，唔可以太窮，唔可以差過我。其實唔單止有錢，都要睇人品，對我好，支持我多啲，花弗唔要，佢一定要有樓，大大間啦。」如果擁有大大間豪宅，以Seasun有錢定義，咁男方身家點都要過千萬，Seasun話：「至少要。」
Seasun再蒲頭做宣傳，佢皮膚光滑咗，化妝冇咁濃，問佢有冇微調？Seasun話：「我幾懶，唔鍾意搞咁多嘢，我見人打水波針，搞到塊面又紅又腫，好唔自然，但啲人追求進步，要keep住做，又晒錢，我咁懶唔會，用錢買樓好過。」如果要Seasun揀最鍾意嘅身體部份，佢話會揀自己啲皮膚：「我最鍾意自己啲皮膚，係身體最大器官，好敏感，接觸外界，其實我份人幾感性。」Seasun自爆有靚膚質因為兩年前開始轉食素，「近排睇住個巿，套戲又上，唔知出面嘅人會點睇，我食素後令胸細咗，冇拍戲時咁挺。」
採訪：楊定
場地：板燒郎
Google Play 2018 年度最受歡迎應用程式，請即點擊 http://bit.ly/2FCthz5 投《蘋果動新聞》一票
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
