香港有間餐廳以機艙作為賣點，而且入面仲有位大家都識嘅女團成員，裝扮成空姐調酒俾大家飲添，佢就係HotCha嘅Regen張惠雅喇！
Regen喺娛樂圈搵唔到食，出嚟打工？佢話：「純粹因為有個朋友喺度做調酒師，所以我就喺度取經，因為我準備開一間屬於自己嘅餐廳。佢哋好好，肯接納我呢個乜都唔識嘅人喺呢度返工。」
Regen覺得三十而立，係時候確定自己人生目標同方向了：「希望自己可以喺三十歲前，有個比較穩定嘅生意基礎同埋收入，所以今次都算係擺晒所有心機、時間、金錢去嚟緊嗰個餐廳，我覺得喺呢個歲數無咩負擔，真係要搏一次，去建立自己事業。」
除咗做老闆，Regen更會大顯身手，下廚、調酒：「好搞笑，我喺澳洲嘅時候，啲室友都會覺得我好癲，因為我成日都會諗到啲好想整嘅嘢食，然後煮出嚟要佢哋試食，有時候味道會好怪，但大部分味道都唔錯嘅。朋友試完之後都話：『點解你亂做一通，但做出嚟都咁好味？』飲酒亦一樣，可能一向有飲開酒，所以對每種酒都有個記憶。到我將啲酒亂溝嘅時候，就好似煮嘢食一樣，大概味道係點樣，點樣取得平衡，就調咗一杯味道唔錯嘅酒出嚟。」
Regen喺鏡頭前下戰書：「大家夠唔夠膽試我杯cocktail呢？」
來源 source: http://nextplus.nextmedia.com
|
鍾意就快D Share啦！
|
|
|