無綫劇《大帥哥》雖然做唔到台慶劇，但都「掹車邊」入到台慶頒獎禮，男女主角、男女配角、最佳劇集乜都齊。有人推張衞健做視帝，一班演員亦搏命谷宣傳。今日係「副帥」洪永城嘅35歲生日，風情萬種嘅姨太太「艾妞」楊秀惠都喺Ig貼合照，祝賀副帥快啲搵個女朋友兼留言：「今日係全宇宙最靚仔副帥#馬炭生日，大家齊齊來為佢送上祝福大個仔啦，祝你快啲搵到真命天女下次整個部隊鍋畀你幫你慶生喇。Happy Birthday Tony！祝你永遠靚仔！永遠快樂健康！」
喺post同「副帥」合照之前，楊秀惠都有提到噚晩嗰場着住性感睡衣色誘大帥哥嘅戲，結果搞到大帥哥忍唔住話：「Yo！打妖精之嘛，使乜驚呀！」之後秀惠仲喺凌晨素顏開live：「頭先嗰個蜘蛛精艾妞，大家有冇睇，嗰啲係演技嚟，楊秀惠真人唔係咁㗎！」佢仲hashtag話：「#監製其實我只想扮演一個正常順眼的女生角色但看來我沒那種命啊輪也不會輪到我！」
身為大帥哥嘅張衞健同老婆張茜就齊齊發功，狂post《大帥哥》嘅宣傳片，健仔今日喺微博貼上一條短片，佢用國語講番熟悉台詞，令人勾起《西遊記》、《鹿鼎記》、《少年方世玉》等經典劇，最後都係叫人要記得三個字--大帥哥。不過，就有網民錯重點，見到張茜平時好鍾意post喺屋企做健身嘅相片，除咗讚佢身材fit爆之外，仲讚健仔係超級好老公，婚後送咗一層5000呎嘅北京豪宅畀老婆揸手，大廳仲放咗一張合照，真係羨慕死人！
其實健仔真係一等一愛妻號，唔似得《大帥哥》劇中咁多情，有四個老婆。佢同張茜結婚多年仍然好恩愛，張茜曾兩度流產，夫妻共同走過最傷痛時刻，令感情更昇華，早前二人更趁空去非洲旅行，sweet到爆。
精選娛聞，喺晒《娛果》 http://fb.com/appledailyent
|
鍾意就快D Share啦！
|
|
|
