周志康老婆竟然着短褲出院，仲話好熱添！
巨聲幫出身的細孖周志康與圈外太太盧芷茵（Emily）育有一名囡囡Emma，日前太太再誕下二公主，今日周志康帶同大女到醫院接太太及細女出院。一家四口現身醫院大堂時，Emily竟犯產後不能吹風大忌，見佢着住超短牛仔褲，佢解釋：「係呀，因為好熱呀，我熱到流晒汗，而且我好少喺室外，轉頭就上車，唔會好吹到風。」周志康即說：「係呀，應該包到實。（你應該強制老婆着條長褲？）我連喺產房出聲佢都鬧，唔畀我講嘢，依家惟有返屋企時幫佢擋住啲風。」
周志康又透露細女預產期喺19號，早咗約兩星期出世，臨生前太太仲行緊街，去到醫院成個過程只用咗兩個鐘BB就出世，佢話：「妹妹好錫媽咪，好順利就出世咗，出世重5.9磅，仲未改名。（負擔大咗？）經濟上就唔係好擔心，反而係照顧方面就擔心啲，太太唔想請工人，唔想屋企有陌生人住，佢主力照顧，而我除咗做嘢，好多時都會喺屋企，好彩長輩都會幫手。」
周志康又謂兩個女兒都好腳頭：「我咁多年台慶都冇中過獎，家姐出世我就中咗隻鑽石錶，今年阿妹出世又中咗鑽石，係好好嘅意頭，係上天嘅祝福。」他又謂自做咗爸爸後，心態上變咗不少：「目標變得好清晰，有咗家庭個人定好多，好明確知要做好自己，更有責任心。（工作上想唱歌或拍劇多啲？）實際上無論唱歌或拍戲我都會來者不拒，冇為自己定一個位。」
來源 source: http://hk.on.cc
|
鍾意就快D Share啦！
|
|
|
