【23:32】新增動新聞
凌晨零時左右，住喺荃灣福來邨嘅鄧先生，聽到永嘉樓對開傳嚟好嘈嘅劈哩啪啦聲，於是佢望出街睇吓乜事，見到有個金毛仔用木棍毆打另一個青年嘅pat pat，但被打嗰個青年似乎完全冇反抗，企定定畀人打，鄧先生覺得好似一幫人內訌，家法伺候咁。
現場係永嘉樓對開錶位停車場行人路，鄧先生見到一個着黑衫肥肥哋嘅青年畀人迫埋牆，一個着白衫金毛仔攞住支木棍，佢後面前後有五個黑衫青年好似睇水咁。鄧先生聽唔清楚佢哋嘈乜嘢，只係間中聽到有人呼喝肥仔，有時又有爆樽聲。
鄧先生估計佢哋得十幾廿歲，個金毛仔好似教仔咁，講完一輪耶穌就毆一下肥仔個pat pat，肥仔只係慘叫一聲，前後相信毆咗四吓。鄧先生諗緊使唔使報警嗰陣，見到有保安員巡邏，金毛即刻停晒手放低木棍，肥仔又冇向保安求救，一班人移師去附近樹底繼續講數，成個過程擾攘咗大約半個鐘。保安都圍住停車場巡咗幾個圈，最後相信都冇人報警。
你敢爆，我敢獎！ 立即WhatsApp《蘋果》24小時爆相爆片熱線或致電：63836568
|
鍾意就快D Share啦！
|
|
|
