【爆相爆片】大媽街頭戰阿伯 只因一個矛盾 __,爆相爆片,

好哋哋行行吓路都會打起交上嚟，唔通又係中港矛盾問題？講緊嘅係上周五（7日）下晝1點幾，有個推住BB車嘅鄉音大媽喺上水廣場嘅行人天橋，懷疑俾個本地阿伯撞 ...

好哋哋行行吓路都會打起交上嚟，唔通又係中港矛盾問題？講緊嘅係上周五（7日）下晝1點幾，有個推住BB車嘅鄉音大媽喺上水廣場嘅行人天橋，懷疑俾個本地阿伯撞到，其間佢就同阿伯發生衝突，仲扯住嗰個阿伯係咁打。街坊見到咁都唔抵得，上前勸交將兩人分開。

目擊市民余先生唔係住喺上水區，但當時佢就行經上水廣場嘅行人天橋，佢話所知係個鄉音大媽推住架BB車，其間懷疑個阿伯撞到BB車個細路，雙方於是就嘈起上嚟，無幾耐仲打起上嚟添。從余先生提供嘅片段可以睇到，個鄉音大媽扯位嗰個阿伯，不斷大嗌：「你個死男人、你個死老嘢吖」，其間不斷出手打向對方。

個鄉音大媽身旁就有另一個女性朋友，當時抱住個BB。余先話係個女友人係幫手抱住BB，而個鄉音大媽就負責打人喎。附近有街坊見到咁樣，就上前勸交拉開雙方。片中可以聽到個鄉音大媽嘅女友人喺度同街坊講，係個阿伯出手打人先，但余先生就話佢見到係鄉音大媽出手打人喎，個阿伯仲好委屈咁解釋係意外撞到對方，話：「我唔係有心㗎嘛！」

現場有街坊話報警啦，但警方就話冇接獲呢單案件有人報案喎。余先生覺得本來好少事啫，一人少句就冇事，但質疑可能係平日上水區居民積埋好多怨氣，又係中港矛盾衍生嘅事件喎。

你敢爆，我敢獎！ 立即WhatsApp《蘋果》24小時爆相爆片熱線或致電：63836568

	大媽架BB車同阿伯疑碰撞，竟然打起上嚟。(讀者余先生提供)	 大媽搶阿伯頂帽，一嘢扑落去。(讀者余先生提供)
 街坊分隔開佢哋，勸佢地唔好打。(讀者余先生提供)

來源 source: http://hk.entertainment.appledaily.com

鍾意就快D Share啦！

下一篇 》