掃呢頁CODE去手機

2019年1月2日 星期三

【不斷更新】2018叱咤頒獎禮 古天樂奪最喜愛的男歌手 __,古天樂,

 48歲古天樂奪我最喜愛的男歌手
「2018年度叱咤樂壇流行榜頒獎典禮」今晚假灣仔會展舉行,女歌手扮靚靚爭妍鬥麗,着高釵裙嘅謝安琪(Kay)真空搶鏡,鄭欣宜以性感tubetop襯外套遮 ...


「2018年度叱咤樂壇流行榜頒獎典禮」今晚假灣仔會展舉行,女歌手扮靚靚爭妍鬥麗,着高釵裙嘅謝安琪(Kay)真空搶鏡,鄭欣宜以性感tube top襯外套遮掩、JW都低胸上陣,鄭融着斜膊裙騷肩,鍾舒漫着透視裙,之前新城「勁爆頒獎禮」同港台「中文金曲頒獎禮」都缺席嘅容祖兒着大紅戰衣壓軸出場。

相關新聞:【瘋狂負評】陳詠謙奪填詞人大獎 網民鬧爆:填得多就拎到,唔代表咩



其他出席歌手仲有張敬軒、吳業坤、Mirror、Supper Moment、衛蘭、ToNick、譚杏藍、鄧小巧、周柏豪、陳柏宇、方皓玟、釗峰、洪卓立、AGA、林二汶等。



不過,打入我最喜愛的男歌手五強嘅陳奕迅今晚缺席頒獎禮,而有份入圍我最喜愛的歌曲嘅古天樂暫時亦未見身影,唔知古仔係咪尾聲出現畀驚喜大家呢!

相關新聞:【叱咤頒獎禮】播出昔日彈結他片段 盧凱彤:越簡單嘅chord係畀到快樂我



0000:48歲古天樂憑我最喜愛的男歌手,全場歡呼尖叫,攬容祖兒:「我真係好鍾意唱歌,不過我唔識唱,呢個世界真係有奇跡出現,我都可以上台攞呢個獎。」



2340:「叱咤樂壇男歌手」金獎由商台愛將張敬軒奪得,軒仔上台攞電話出嚟睇多謝名單,話怕年紀大講漏。軒仔講咗5分鐘都未講完,音樂起咗,軒仔要求將音樂拉細聲,話想用唱歌時間講,因為唔係成日有機會,最後軒仔講足8分鐘。



2335:許廷鏗獲叱咤男歌手銀獎,喺台下興奮同欣宜擁抱,佢上台激動話:「一直以嚟許廷鏗唔係最好最叻,為咗唔想表現畀大家知,自己一直好繃緊,一直覺得自己唔夠努力唔夠爭氣,自己一直好幸運,所以2019年第一日,我同自己許下承諾,我要爭氣做好自己。」由於佢講唔停,台上突然播出叱咤樂壇男歌手金獎嘅solgan,森美話:「呢個係你出年目標。」許廷鏗被迫暫停,尷尬講埋最後一句:「共勉之。」



2329: 森美負責宣佈「叱咤樂壇男歌手」,銅獎由周國賢奪得。佢話14年前今晚第一次踏上呢個台,當時係攞新力軍。講感受時,周國賢提到一位曾經同佢一齊彈結他作歌嘅已故友人,全程強忍淚水,雖然佢冇開名講邊個,但佢口中講緊嘅朋友就係盧凱彤。



2318:謝安琪首度奪得「叱咤樂壇女歌手」金獎,今晚大豐收嘅佢,上台前已表現激動想喊,然後上台講咗長長嘅感受,再唱多一首歌。



2316:Gin Lee奪叱咤女歌手銀獎,雙手舉V行上台:「我帶住感恩謙卑心攞呢個獎,提醒自己要唱得好。」



2311:AGA第一次攞「叱咤樂壇女歌手」,一聽到自己得掩住面喊,上台前祖兒行出來同佢擁抱。AGA多謝15年不敵癌魔離世嘅姐姐,佢話自己當年辭職唔做空姐,寫歌3年都冇一首歌中,喺街行諗自己點解咁慘,食餐飯都冇錢,佢因為唔想父母擔心,就打咗畀姐姐。



2254:宣佈叱咤樂壇組合三甲得主,Supper Moment獲銅獎,Dear Jane獲銀獎,而成軍10年嘅RubberBand奪金獎。



2250: I Love You Boyz嘅少爺占同當奴上台,講到有好多人問今晚點解冇「DO」姐,大銀幕上影住一啲短訊嘅訊息,但「DO」字就打咗格仔,少爺占同當奴就話,因為今晚係ViuTV播。



2244:「叱咤樂壇至尊唱片大獎」由麥浚龍(Juno)同謝安琪合作、喺上個月中先推出嘅《The Album part one》奪得,Juno同Kay一齊上台,同時多謝合作團隊,但Juno話雖然係監製,但覺得做呢張專輯唔係個人榮耀,所以佢今晚冇準備演出,最後由Kay獨自表演。



2222:至尊歌曲大獎由容祖兒《心之科學》獲得,曾經攞過女歌手三甲、至尊唱片、我最喜愛的女歌手嘅祖兒,今晚終於首奪至尊歌曲獎,成就大滿貫。



2213 謝安琪《一個女人和浴室》獲叱咤十大第2位,謝安琪話好開心,多謝Juno同佢合作做呢個醉心計劃,又話其實佢哋好冒險同冇乜經驗,大家鍾意好開心。



2204:RubberBand《未來見》獲叱咤十大第3位,4子喺台上分別多謝另一半,阿正話首歌送畀太太兼多謝太太,仲要多謝fans,唔講呢句返後台會畀人鬧,阿偉亦多謝太太同囡囡,6號都多謝太太。



2203:Eason and the duo band嘅《可一可再》攞上台攞獎叱咤十大第4位,但陳奕迅冇到,由環球唱片公司派高層代領



2158:張敬軒《天才兒童1985》獲叱咤十大第5位



2152:DJ謝茜嘉宣佈:「《錢七》,周…國賢 」周國賢興奮到跑上台攞獎,因為佢未講完感受,現場就播歌,搞到佢唱第一句時入唔切甩嘴。



2142:AGA憑《無期》奪叱咤十大第7位。



2135:周柏豪憑《老少平安》獲叱咤十大第8位,點知DJ梁文禮卻講錯為周國賢,現場一遍笑聲,梁文禮尷尬到爆。



2131:「叱咤十大」開始頒獎,第10位係王菀之嘅《沉默的士高》,但佢有工作在身缺席頒奬禮,由公司代領。第9位係陳柏宇嘅《認真如初》,佢未唱前話:「生咗女之後好多時會反思,點樣可以做到最好,等個女問我時會識答,諗快樂同意義係咪相同呢?我想意義係照顧個女…」司儀催佢唱歌,陳柏宇叫起音樂先,佢繼續講:「希望大家學識欣賞身邊少少嘅開心,可以積埋成為快樂同意義。」



2128:現場播盧凱彤講音樂片 ,最後字幕出一句:「叱咤 念 盧凱彤」。



2118:叱咤唱作人銀獎得主為江海迦(AGA),佢上台感謝爸爸。而金獎得主係林奕匡,佢話:「讀書時我冇乜自信心,成日抬唔起頭做人,上到台唔容易,可以不斷做音樂係我福份。」。



2111:輪到叱咤唱作人獎,銅獎得主係陳蕾,佢上台攞獎時激動落淚,為今晚首位喊住得奬嘅得獎者,佢話:「做獨立音樂真係好難,今日攞到呢個獎非常開心。」佢更加喺台上多謝MJ@Mr.:「即使關係改變咗都咁都支持我。」唔知係咪暗示兩人已分手。



2101:叱咤作曲人大獎由Cousin Fung奪得,填詞人大獎就由陳詠謙奪得,編曲人大獎就由王雙駿奪得,監製大獎就落在舒文手上。



2042:首先頒發叱咤生力軍三甲,銅獎由黃妍奪得,銀獎係曾樂彤,金獎係洪嘉豪。



精選娛聞,喺晒《娛果》

http://fb.com/appledailyent



 「叱咤樂壇男歌手」金獎由商台愛將張敬軒奪得 「叱咤樂壇男歌手」金獎由商台愛將張敬軒奪得
 至尊歌曲大獎由容祖兒《心之科學》獲得

至尊歌曲大獎由容祖兒《心之科學》獲得
叱咤生力軍金獎洪嘉豪(ViuTV截圖)

叱咤生力軍金獎洪嘉豪(ViuTV截圖)
叱咤生力軍銅獎黃妍(ViuTV截圖)

叱咤生力軍銅獎黃妍(ViuTV截圖)
叱咤生力軍銀獎曾樂彤(ViuTV截圖)

叱咤生力軍銀獎曾樂彤(ViuTV截圖)
陳蕾捧唱作人銅獎,激動邊喊邊講得獎感受。(攝影:陳慧安)

陳蕾捧唱作人銅獎,激動邊喊邊講得獎感受。(攝影:陳慧安)
唱作人金獎得主林奕匡,係佢第3度得此獎。

唱作人金獎得主林奕匡,係佢第3度得此獎。
AGA捧唱作人銀獎,同時憑《無期》奪叱咤十大第7位。

AGA捧唱作人銀獎,同時憑《無期》奪叱咤十大第7位。
周柏豪憑《老少平安》獲叱咤十大第8位,點知DJ梁文禮卻講錯為周國賢,現場一遍笑聲。

周柏豪憑《老少平安》獲叱咤十大第8位,點知DJ梁文禮卻講錯為周國賢,現場一遍笑聲。
陳柏宇憑《認真如初》奪叱咤十大第9位。

陳柏宇憑《認真如初》奪叱咤十大第9位。
周國賢憑《錢七》得獎

周國賢憑《錢七》得獎
張敬軒《天才兒童1985》獲叱咤十大第5位

張敬軒《天才兒童1985》獲叱咤十大第5位






鍾意就快D Share啦!