【壹夢成真上集】 丁可欣唔鍾意火雞姐 周國賢：其實你壓到場有殺氣http://bit.ly/2ESjNOQ
火：其實我以前認識Endy嘅時候，因為中學時好鍾意Avril Lavigne，好鍾意rock music，第一次聽《搖滾叛徒》嘅時候，就開始認識佢，當時落街打波，會用喇叭播住首歌，去到後期知道Endy愈嚟愈多投入自己創作，包括作曲、作詞，好欣賞嘅才華就係，因為就算我未做歌手之前，成日都覺得自己嘅音樂，應該要自己盡量去投入。早前自己經歷一啲情感問題，最近不斷聽呢首歌，真係令我覺得 我唔識得形容當中感覺，但喺音樂中感受到自己，我覺得係音樂神奇之處，可以聯繫所有人。
周：明白，首先好多謝你，《搖滾叛徒》呢首歌自己都好多年無聽過，甚至有少少唔記得咗呢首歌。
火：你以前嘅創作，同你最近推出嘅兩首歌，《錢七》係咪講關於兄弟情嘅歌曲？
周：《錢七》係我隊band結他手高佬寫嘅一首歌，呢首歌其實係講我同佢喺紐西蘭成長嘅90%真實片段。
火：自己創作對上三首歌嘅時候，因為都將自己內心世界打開，我發覺其實有種恐懼，反而對住自己創作嘅作品時，都有一刻驚抽離唔到，但當歌曲推出後，我覺得的確可以透過自己創作，然後幫自己解決咗一啲心理關口，因為我覺得自己都幾容易受心理關口影響，但有時會覺得，如果啱啱開始創作都會有呢啲情況，你一直以嚟咁多起伏嘅時候，其實喺邊個位搵番繼續或者鼓勵自己嘅方法，因為自己有時候都會好迷惘。
周：我覺得首先要去盡，我唔知你有冇睇過Lady Gaga有套紀錄片，有一部分關於佢嘅創作過程，佢話每一次作曲就好似要打開個心，拎啲感覺出嚟咁樣，而我相信每一位從事創作嘅朋友都會有類似經歷，所以我嘅建議係當你決定打開個心，赤裸裸拎嗰種感覺出嚟嘅時候，就要全情投入唔使驚。反而每次咁樣做完之後，其實會療癒咗一啲情緒上嘅問題，可能係閉塞咗嘅情緒，我覺得係咁樣。
火：有時會諗，創作音樂時會建基於自己嘅實質情緒，令你產生一種創作靈感，定係會包含好多幻想元素，你會係點樣嘅？
周：兩樣都有嘅，但有時都可以有啲角色扮演，我覺得經驗好緊要，友情好愛情又好，開心與唔開心嘅嘢，呢十幾年我自己都儲起咗一個情緒銀行，而家寫歌嘅時候好似執藥咁樣，嗰件事未必百分百真實，可能有20%係發生咗一件事令我想寫呢首歌，其餘嗰啲就會喺情緒銀行攞啲情感出嚟，呢個係我編曲同寫歌嘅方法。
火：雖然係第一次見面，但透過唔同社交平台，我一直都跟有留意佢嘅動態，好搞笑嘅係，我真正見到你之前，身邊嘅同事都會同我講，佢可能會有啲慢熱，你講多啲嘢啦，但我發覺唔係呀，其實無嗰種狀態，我覺得幾好。
周：經過我哋深入嘅談話之後，你俾我感覺最初係我有啲驚，因為你有時說話都幾兇狠，喺網上見到，所以我今日反而係有啲緊張，佢會唔會好harsh，會點樣呢？但係又唔會喎，你頭先所講嘅，例如做自己想做嘅事，或者經歷緊嘅關口，我都覺得你因為緊張呢件事，因為你好想做好呢件事，所以先會遇到一啲自己衝破到嘅難關，但我知道你一定得嘅，我感覺到你有一股熱誠，所以大家期待火雞姐未來嘅創作，跳舞又好，唱歌又好。
火：多謝你。
周：因為節目開始之前我好驚俾你打，所以我心口已經鑲咗鋼板，呢個係我啱啱新推出嘅，其實係去年《銀河鐵道之夜》嘅原聲CD，請笑納。
火：多謝你呀，好彩我都有備而嚟，同我偶像梗係要有自己作品，呢個就係《剩下我的回憶裡》嘅CD，佢係一本簿嚟嘅，所以你畫花佢又得，寫啲感覺又得，因為我嘅意念係回憶，我覺得回憶除咗可以係影相，或者感覺、說話之外，寫嘢都係一個非常好嘅方法，所以係一本記事簿嚟嘅。
攝錄：王志明、吳斯金
採訪：肥A
相關文章：
【壹夢成真撐病歌迷】衛蘭親落時代busking 撐IgG4病患者陳康健（上集）https://nextplus.nextmedia.com/news/latest/20180523/588257
【壹夢成真】衛蘭落時代busking 撐IgG4病患者陳康健（下集）https://nextplus.nextmedia.com/news/ent/20180523/588269
【壹夢成真】帶聽障女生過澳門 睇偶像側田演唱會（上集）https://nextplus.nextmedia.com/news/latest/20180613/593310
【壹夢成真】澳門直擊 聽障女生方包搞到側田眼濕濕（下集）https://nextplus.nextmedia.com/news/latest/20180613/593330
【壹夢成真★同偶像合唱】街唱Judas好聲音 偶像關家姐出山jam歌支持（上集）https://nextplus.nextmedia.com/news/latest/20180407/579842
來源 source: http://nextplus.nextmedia.com
|
鍾意就快D Share啦！
|
|
|
