日前推出電影trailer，標明係「周星馳導演作品」嘅賀歲片《新喜劇之王》，將於大年初一上映，相信星爺fans定必翹首以待。數數手指，對上嗰部《喜劇之王》，原來已經係20年前嘅作品，當年嘅黃金組合係周星馳同張栢芝，栢芝仲係啱啱入行，真係18歲卜卜脆，o依家已經係一位有3個仔嘅媽咪，時間眨吓眼就過咗。
雖然栢芝今次冇份拍《新喜劇之王》，不過星爺特別搵番栢芝幫手，但就由幕前轉到幕後，昔日嘅「尹天仇」變成導演，誠邀「柳飄飄」為電影特別聲演，星爺話：「如果要拍《喜劇之王》，張栢芝自然係不二人選。」
因工作而重聚，栢芝覺得星爺同自己預期嘅好唔同，佢話：「佢o依然好後生，冇我想像中做導演好滄桑嘅樣。」問到星爺點解會搵栢芝為戲中角色配音？星爺笑言：「拍《喜劇之王》喎！如果唔係搵佢，我都唔知可以搵邊個。」
近日曝光嘅製作花絮，見星爺監督栢芝配音，仲好搞鬼做番當年星爺摸栢芝下巴嘅經典動作，而一身黑衣打扮嘅栢芝明顯仲未收晒身，久別重逢嘅佢哋，配音過程都好歡樂，同時亦見到栢芝專心工作嘅一面。
星爺透露《新喜劇之王》係講述一個臨時演員嘅奮鬥過程，當中嘅故事同大家所認識嘅《喜劇之王》睇落好類同，但其實內有乾坤。除咗秉承咗自己嘅喜劇風格同特色，星爺仲話今次女主角比較似自己，而栢芝認為《新喜劇之王》仍然保留唔少周星馳嘅個人風格。
「尹天仇」同「柳飄飄」再次碰頭，少不免會勾起當年拍攝《喜劇之王》的種種回憶，回想自己第一部戲就要同星爺拍對手戲，栢芝坦言：「我反而唔驚佢，係驚自己做得唔夠好，我知道自己用心就可以演得好。」星爺即話：「其實栢芝唔使用心都可以做得好好。」
星爺嘅經典作品有好多，今次以新故事內容拍攝《喜劇之王》，別有一番味道，栢芝覺得呢個係好好嘅選擇：「大多數人都覺得周星馳就係同搞笑掛勾。人生有幾多個20年，想拍就去拍！」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
