因為監製係王晶嘅緣故，《荷里活有個大老千》未播出先打折扣，不被觀眾睇好。不過，至今播咗兩星期，整體而言其實比想像中好，特別係一班老戲骨孭飛嘅情節，高水準演技有睇頭。可惜，金燕玲實質只係客串身份，5集已經退場，無得再欣賞佢同鄭則仕對手戲。黃栢文戲份更加少得可憐，加埋唔夠半集就瓜老襯，明明佢一秒內由警覺精明變裝瘋賣傻嘅演技相當搶眼，仲以為佢角色份屬千門八將會有更多發揮添。
好彩，雖然部分戲骨提早收工，但其他演員以及某啲情節都有吸引之處，例如李施嬅帶住文凱玲、陳雅思同劉溫馨三條女不時都爆出笑點，特別係李施嬅親身示範點樣勾引男人，三條女隨即有樣學樣一part，堅好笑；鄭則仕三不五時就露兩手高級千術，觀眾亦相當喜歡睇；撇除吳業坤偽毒形象唔討好而言，佢水鬼升城隍劇情都唔錯，都演得幾好。
當然，悶嘅情節都有唔少，例如劉溫馨同個唔收規警員嘅感情線，悶，唔使播咁多，唔該。又例如王子涵不時需要跳舞，連家中長輩都話佢淨係扭身扭勢麻麻地，偏偏劇中大讚佢跳得好好，搞到成件事好尷尬。
來源 source: http://nextplus.nextmedia.com
|
鍾意就快D Share啦！
|
|
|
