關寶慧同堪輿學家蘇民峰，噚晚去觀塘為劉晨芝主持嘅面包台節目《十二道芝味》擔任嘉賓，兩女一見到蘇師傅當然唔會放過機會，不斷叫蘇師傅幫佢哋睇姻緣，點知聽到蘇師傅一批，兩人即叫苦連天，蘇師傅仲狠批關寶慧嫁唔出，寶慧「喊爆」話：「又話我大運已過，又話我嫁唔出，師傅話唔結婚可以生仔先，但係我想有老公，唔想生仔呀。」而蘇師傅補充：「我係話高峰運係喺22、23年，姻緣嘅嘢好多人會錯過，有姻緣唔結都冇用，有得嫁好嫁，離婚至算，積極把握。用風水擺桃花，正西擺杯水加音樂盒，想快嘅就將床對住廁所瞓。」劉晨芝被批嫁唔正常姻緣，要嫁老夫，二人異口同聲說：「如果嫁到叫我瞓街都瞓。」
提到樓市，關寶慧問到今年係咪適合買樓？蘇師傅話：「冇嘢值得買！投資冇價值，如果真係要上車好驚冇樓嘅，就買間細細嘅自用，24年先會有大波動。」至於娛樂圈，師傅就話今年唔係特別喜事年，冇乜特別，但預言會特別多撞車意外。
另外，關寶慧主動問到林嶺東導演嘅喪禮安排，佢話：「佢係我嘅恩師，係佢帶我入行嘅，亦都係第一個搵我拍戲嘅人，本來佢搵我同周潤發演《俠盜高飛》，做主角，當年TVB幫我推咗，之後拍咗兩部，但唔係main，佢好錫我，只係唔鬧我。佢係一個非常之好嘅導演，佢拍戲嘅方法思維，好受用，可以講佢係一個好偉大嘅導演，追思會我一定會去。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
