甄子丹作為「宇宙最強」，電影衝出國際已唔係新鮮事，2016年就去咗荷李活拍《俠盜一號：星球大戰外傳》，55歲子丹噚晚踩入時裝界，去咗米蘭時裝周，唔係做嘉賓睇騷，係做model行騷。
佢老婆汪詩詩當然有陪子丹去到米蘭，樂做跟得老婆，仲喺ig貼咗唔少相，佢同美國名媛Paris Hilton坐第一排睇騷，幫老公影行騷相，子丹仲有同品牌設計師Philipp合照留念。據知，品牌設計師Philipp早已看過子丹電影，認為佢係亞洲英雄，兩人碰面談天說地，惺惺相惜。
呢單新聞喺大陸就好有迴響，皆因呢個牌子早年曾涉及「辱華」風波，佢哋曾設計過一件印有「Fxxk You China」字樣tee，令到呢個牌子進軍大陸市場引起軒然大波。最後個牌子面對咁大嘅市場壓力都要道歉，不過喺道歉新聞稿入面，就畫咗一個留辮嘅人跪喺地上，唔少大陸網民就對子丹團隊無查清楚呢個品牌背景就合作嬲嬲豬。
今日5點，事件發酵唔夠12小時，已被內地網民鬧爆，子丹亦好有「關公」意識，知道事態嚴重，喺微博貼咗工作室聲明，留言：「無論何時、何地、何種形式，祖國堅決不容許侵犯。」聲明入面，提到「甄子丹工作室的團隊成員與該品牌合作前，未經深切了解而造成的疏忽鞠躬道歉。甄子丹先生獲知後已立即停止與該品牌的一切合作」。
子丹今次係擔任客席模特兒，為一個時裝品牌行騷，對於子丹嘅身高方面就眾說紛紜，根據維基顯示佢係173cm、約5呎8、而大陸傳媒亦寫過佢得167cm、約5呎5高。話明係「宇宙最強」，以子丹嘅星味同知名度咁高，年紀、身高根本唔係障礙，第一次行時裝騷獲大會安排做壓軸model，行出嚟chok爆嘅自信，壓台兼有氣場，與台上嘅6呎高小鮮肉男模比較，子丹一啲都唔輸蝕。完騷後，佢就分享行騷感受：「好耐冇試過咁high，可能係第一次走上真正國際時裝舞台，同之前喺自己眼鏡品牌行騷感覺又不一樣。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
