80年代拍攝《風雲》系列電影聞名的導演林嶺東上月29日猝逝，終年63歲。杜琪峯及徐克等組成的林嶺東追思委員會，昨日在中環舉行追思會，多位演藝界好友出席憑弔。張家輝出席追思會時，透露林嶺東正籌備一部講述自己人生領悟的電影，兩人也已經開會，問到會否替對方完成遺願時，家輝無奈地說：「冇人幫佢做到。」
相關新聞：接戲要自由 太太影響大
著名導演林嶺東上月29日於馬鞍山寓所猝逝，終年63歲，其家人於本月9日已為他低調設靈，並翌日舉殯。由林嶺東好友杜琪峯、徐克及岑建勳等組成林嶺東追思委員會，昨日在中環為林嶺東舉行追思會，張家輝、古天樂、黃秋生、盧海鵬、林家棟、郭藹明等多位圈中好友都有出席悼念。
張家輝讚揚林嶺東對香港貢獻巨大，令香港電影可以揚名海外，又透露早前正與林嶺東籌備新戲：「以前住佢隔籬屋，但大家都唔係太了解對方。好不幸亦都好有幸地，佢想籌備一部電影，講述佢自己嘅人生領悟，好有幸咁搵咗我去拍。」家輝坦言上月仍有繼續與林嶺東及監製開會，所以接到林嶺東離世的消息時，心情非常複雜：「一個朋友、一個咁好嘅導演，一個準備開嘅project，乜都冇晒。」
共通點促成合作
家輝透露原拍開動作戲的林嶺東，今次想反過來拍文戲講述自己的看法：「今次大家傾咗咁耐，佢係一個好愛太太嘅男人，太太咁多年都好支持佢，同埋佢同杜生又係青梅竹馬，因為呢個戲了解佢多咗。」問到會否替林嶺東完成電影，家輝說：「呢個係佢嘅領悟、人生感受，其實冇人操控到，係佢前半生同後半生嘅睇法，冇人幫佢做到呢個遺願。」
家輝與林嶺東惺惺相惜，合作也是因為他們的共通點，就是遇到覺得正確的事情會不顧一切，他透露：「個project唔係演番林嶺東，而係一個警探，個警探做人嘅宗旨就係佢前半生嘅領悟。」
相關新聞：任達華為悼好友改航班
杜琪峯：從未失聯
杜琪峯代表委員會接受訪問，他表示：「多謝大家關心，阿東係一個熱愛電影嘅工作者，平時生活簡單、低調，佢嘅葬禮跟番佢屋企人嘅安排，盡量簡單、平靜舉行。」杜琪峯透露在追思會上都會盡量分享開心事，因為林嶺東是個開朗的人，不會想見到朋友為他不開心︰「今日畀大家回憶番同阿東開心嘅日子，所以林太攞咗阿東生前嘅酒嚟同大家分享，藉住今日嘅追思會，希望大家友誼長存。阿東嘅離開令大家更團結，希望大家珍惜現有、活在當下，生活都總要過。」
與林嶺東識於微時的杜琪峯，難掩痛失摯友的傷感，坦言心情未平復︰「其實都冇得好番嘅，呢個係我四十幾年嘅朋友，我哋由73年相識到𠵱家，好多接觸，無論佢喺邊度返嚟，佢都會搵我食飯，45年嚟都冇試過失聯，亦冇拗撬，佢嘅離開更加令我覺得所有嘢冇我想像中咁簡單，嚟得快就去得快。」
採訪︰張俊銘
攝影︰仇志德
|
鍾意就快D Share啦！
|
|
|