「對於我嚟講，今年團年飯真係有重大意義。」張慧儀擁著心臟手術成功的15歲養子說。
養子Hanson患先天心臟病，去年心臟問題越見嚴重，易倦的Hanson生活漸受影響。故去年底在醫生建議下，動了一個歷時近十個小時，以人工導管將上下腔靜脈連接至肺動脈的心臟手術。
留院期間入過ICU及重症病房，今天大步檻過，能與媽媽一起吃團年飯迎新年，對張慧儀母子而言，不是必然。
因為手術後，Hanson半個月失去意識，認不出媽媽。
「而家佢行得、走得、食得，嗰時佢樣樣都唔得，連我係邊個佢都認唔到，有呢個對比，所以今日佢完全康復，我覺得好感恩。好多謝醫生同一班醫護人員嘅悉心照顧。因為佢做完手術不久，唔可以如以往搭飛機返馬拉過港，所以今年我倆第一次留喺香港過年，而屋企人，例如爸爸媽媽、家姐同女兒、阿妹都飛嚟香港一齊過年。」
回想兒子在病房的日子，張慧儀每天坐立不安。「佢唔喺屋企，喺醫院狀態最唔理想嗰段時間，我真係瞓唔到覺，食唔到嘢，好難過，嗰剎那我就諗，以前佢喺屋企時都算乖，但我成日都話佢，日後佢返屋企，我要更加愛錫佢。有過今次經歷，我覺得兩母子嘅感情真係有增進，同埋會盡量抽時間喺埋一齊，我哋而家係連體嬰。最近佢要求每晚拍住佢背脊入睡，有時我拍到好攰話唔拍嘞！但轉頭都會繼續拍，因為佢慢慢長大，總會有自己空間嘅時候，到時我想多啲陪佢，都未必有呢個機會。」她對養子的愛，超乎很多有血緣的關係。當前問Hanson如何報答媽咪？15歲步入青春期的他，開始對鏡頭害羞，故儘管心裡有無盡的感激，但最後只簡單說了兩字:「吸塵！」在旁的張慧儀，幫他解讀：「佢而家懂事好多，會幫手做家務，吸塵、洗碗。」
兒子手術前，張慧儀擔心得每晚躲在房裡哭，手術後，作為母親，仍然憂慮處處。「當日Hanson做手術時有好多未知之數，亦都知道手術嘅複雜性，之後佢留咗好長時間喺深切治療部同重症病房。因為手術過程唔算太順利，所以手術後要令佢深層睡眠三日三夜，用嚟保護個腦，呢個俗稱叫冷凍，大概意思就係深層睡眠幾日嚟保護佢。我睇住佢瞓咗幾日，當時心情好複雜，因為佢未醒，每一日行入ICU之前都好驚，個心會跳得好快，因為我唔知道今日會有咩信息俾我。
「我返到屋企，佢坐過嘅梳化我唔敢坐，唔知點解自己會咁樣，係逃避定係咩原因？半夜瞓唔到坐喺床，會不停叫住Hanson，嗰一刻會諗：『只要你健康好番，要媽媽點樣都得。』。」
Hanson深層睡眠120小時後。
「過咗三、四日之後，我行入病房見到佢開咗眼，我第一個反應係好開心，但後來發現佢無意識，又唔知我係邊個，嗰一刻我就好驚，佢呢種狀態維持咗一段好長時間，我諗有十幾廿日，唔認得我係邊個，就算我同佢講佢最喜歡嘅幪面超人，佢都唔知係咩！嗰段時間我好擔憂。」
養子跟病情搏鬥，她跟心思搏鬥。
「我叫自己唔可以倒下，唔可以有任何負面想法，不斷同自己講，呢個只不過係一個過程，佢一定會慢慢好番。直至有一日，我喺重症病房忍唔住，因為我見到護士幫佢換片，嗰一刻好心痛，終於忍唔到，衝出病房搵個地方，將多日累積嘅情緒爆發出嚟，喊完之後就舒服好多。」張慧儀說。
當刻看著兒子的狀況，她作過最壞打算。
「坦白講我有諗過，佢一直唔認得我的話，我問自己：『如果係咁樣我會點呢？』我好肯定咁答自己，無論Hanson變成點，媽媽都唔會離棄你，我只會更愛錫你。如果真係咁樣，或者我哋會用另一種方式，未必會喺香港生活，帶佢返馬拉重新嚟過，我會咁樣諗。
「見到佢好心痛，成身插晒喉，又無意識，連自己生活都自理唔到，我非常心痛。如果我哋冇經歷呢啲，對起身、食飯、行路、飲水，都會覺得理所當然嘅一件事，但而家深切體會，幸福的確唔係必然。所以只要佢健康就OK，我哋去邊度都會一齊，而家我哋係連體嬰。」
踏入豬年，兩母子要實現15年來想做但未做的事。
「我最想2019下半年，Hanson可以坐飛機嘅時候，同爸爸媽媽帶埋佢一齊去旅行，因為佢好想去日本，已經講咗好多年，但未試過實行，希望2019年可以實現呢個夢想，因為佢好鍾意幪面超人。」在旁的Hanson，立刻幪面超人上身，看在張慧儀眼裡，只要兒子能康復，那怕割了她的肉。
採訪:Sukey
攝錄:黃志明
服裝:Laurel
立即下載Apps，隨時隨地睇盡時政專題、深度偵查、娛樂熱話！按此連結： http://bit.ly/next28app
|
鍾意就快D Share啦！
|
|
|