「原班人馬」，用得呢點作為招徠，一般都係個優點。不過，《皓鑭傳》成績麻麻，有人認為某認度就係衰喺「原班人馬」之上。畢竟《延禧攻略》太成功，每個角色都令人印象深刻，就連劇中好早出場又好快賣鹹鴨蛋嘅閒角，例如繡坊繡女吉祥、玲瓏等，觀眾至今仍記得佢哋造型、記得發生喺佢哋身上嘅劇情。
當《延禧》角色仍深植觀眾心嘅時候，《皓鑭》反而出現好多相同面孔，家中長輩見到岫玉，仍會叫佢做舒妃；睇到公子蛟，繼續嗌佢弘晝或者和親王；到醫師殷小春出場，會話終於有明玉喇！唔知大家又有無出現呢種以《延禧》角色名，去稱呼《皓鑭》人物嘅情況呢？如果有嘅話，睇怕每個參與過上部劇嘅演員出場，大家都要叫一叫佢哋《延禧》個名，而且人數都唔少，好似高貴妃、袁春望、愉妃、珍兒、方姑姑、張嬤嬤、裕太妃等等。
當然，觀眾會叫李皓鑭做魏瓔珞、叫呂不韋做皇上乾隆嘅情況應該好少，如果連男、女主角嘅名都不被觀眾記住，咁《皓鑭傳》就真係非一般的失敗喇！
順帶一提，有人指兩部劇嘅角色安排，其實係有前世今生嘅味道喺裡頭，因為李玉雖然喺《皓鑭傳》做咗丞相，但骨子裡仲有浸太監除；瓔珞老竇無論喺咩朝代，依然為咗家族、仕途，賣個女落「火坑」；錦繡繼續搞小動作整鬼女主角，而吉祥仍然係女主角嘅好姊妹。
來源 source: http://nextplus.nextmedia.com
|
鍾意就快D Share啦！
|
|
|
