鄧一君呢個名，真係唔係人人都有印象，畢竟代表作《記得……香蕉成熟時》已經係1993年嘅電影，而且佢2005年已經退出娛樂圈，轉行做財務策劃師、賣保險。而家正職穩定，佢更學人創業做老闆，喺油麻地開咗間「一君士多」主打車仔麵：「今日第一日試業，初四先正式開，一個新嘗試。」第一日試業已經有客上門，係個好開始，佢仲話要請古天樂試下味俾啲意見。
鄧一君嘅演藝事業由童星開始，15歲時更因為飾演電影《縱橫四海》周潤發童年版，而被哥哥張國榮點名睇好加以提攜，與古天樂、古巨基齊名為「雙古一鄧」。加上主演電影《記得……香蕉成熟時》並成功獲得提名金像獎「最佳新演員」。當時鄧一君點睇都係星途璀璨。直到1996年加入TVB，更喺1998年拍《烈火雄心》時同古天樂飾演親兄弟，劇中古仔悉心照料智障細佬鄧一君，然後戲假情真咁做埋好兄弟。鄧一君今次做老闆，會唔會搵埋老友入股擴充？佢就話：「我哋呢啲小本經營嘅嘢佢未必有興趣，人哋做大生意㗎嘛。」唔入股唔緊要，但佢話一定會請古仔試下味。
講返轉頭，鄧一君演藝事業唔似得老友古天樂咁順利，因為生得童顏戲路反而受限，好多時都係做某人細佬、某君徒弟、某某年輕版，佢唔甘心成世都係做呢啲，把心一橫就離開娛樂圈投身保險業，決絕得就算有戲癮都唔會再拍戲，話擔心客戶覺得佢工作唔專注唔專業。已經唔使出鏡，而且鍾意食，鄧一君外形敦厚咗好多，的確有個老闆樣。
來源 source: http://nextplus.nextmedia.com
|
鍾意就快D Share啦！
|
|
|