現年63歲的柳影虹，入行長達42年，首次拍劇已當女主角，其後因利乘便唱劇集主題曲，星途可謂一帆風順。可惜，89年她因拍無綫電視電影《霓虹姊妹花》一幕打架戲，被梁藝齡（原名梁佩玲）踢歪盆骨，令她痛不欲生。幸好，老公周富祥始終對她不離不棄，每日貼身陪伴她睇醫生，患難見真情：「將來我乞食都跟住佢！」
人稱柳姐的柳影虹，自幼家境不俗，父親在紗廠身居要職，早年她曾考入無綫藝訓班，可惜被母親阻止而停學。其後柳姐到夜總會唱歌，77年參加麗的電視藝人訓練班而入行，第一次拍劇已經當女一，86年更過檔無綫發展，可惜她卻於89年拍電視電影《霓虹姊妹花》一場打架戲，被梁藝齡踢歪盆骨，椎間盤突出而被迫停工，更險些令她下半生要坐輪椅。
這段痛苦經歷，柳姐至今提起仍記憶猶新︰「其實唔關梁佩玲事，係導演卓伯棠成日話佢踢得假，啲替身又收晒工，我哋拍到第二朝八點佢都唔收貨，之後要趕外景，最後我惟有硬食一腳，初時我唔知咁大鑊，冇報工傷，否則醫療費就要無綫畀。」重提當年受傷後的痛楚，柳姐不禁眼濕濕︰「最嚴重係瞓床年幾，企都企唔穩，乜嘢大醫生都睇勻。最後搵聖德肋撒醫院嘅骨科權威邱明財，佢叫我做開腰骨手術，但話有五成機會癱，我得35歲咋，幾時癱到80，條腰痛到被火燒咁，生不如死，日日嗌跳樓。初時未搵到病因，仲以為係膽石，我痛到逼個醫生幫我割咗個膽，手術後仲慘！前又痛、後又痛，老公怕我自尋短見，所有窗都鎖晒。」
柳姐說當年睇骨科每次都要花四、五千元，多年來單是醫藥費花掉數十萬元，最慘是每隔幾日就要打類固醇針止痛，副作用令她口腫面腫，幸好遇到一名跌打師傅，腰患才有轉機，柳姐說︰「好彩做開腰骨手術前一晚，有人介紹咗個師傅畀我，第二日俾佢整，嘩！痛到飛起，第三個禮拜我終於勉強行到。之前唔郁得，晚晚要等老公返嚟同我清理大、小二便同沖涼，真係想死！」
病情有轉機，老公周富祥每日扶柳姐到公園學行，行足半年才康復。患難見真情，柳姐感慨說︰「我呢個老公，唔使我生仔又唔使我煮飯，仲日日孭我睇醫生，所以佢將來就算乞食我都跟住佢！」雖然現在行動自如，但舊患不能根治，每隔數天就要做按摩，否則腰痛會復發。
其實，柳姐的老公周富祥，是警務處前高級助理處長，離職後做過保安一哥，月入六位數字，近年他更將名下物業轉讓給愛妻。柳姐冧爆說︰「我唔敢郁佢物業，都係佢話事，佢超有責任感，屋企嘢都爭住嚟做。有時我都會怨佢︰『老公，你畀我成長吓，唔係將來有乜事，我又好似個廢人，咁點算！』」老公照顧周到，開騷對柳姐來說，可以爭取存在感︰「今年3月同4月開一場，3月喺香港大會堂舉行。今次演唱會搵咗啲老友歌王、歌后嚟壓場，之前同尹光、葉振棠都好合拍，可能再合作未定，不過嘉賓而家唔開估，到時畀大家驚喜。」
場地提供︰築地．山貴水產市場
精選娛聞，喺晒《娛果》
http://fb.com/appledailyent
第二屆最港電影大獎投票網址
https://bit.ly/thekongestfilmawards2018
10萬蚊 100人分！
星期一至五晚上10點半
《動腦Q》Let's Q the money！
http://bit.ly/2QW8LcI
|
鍾意就快D Share啦！
|
|
|
