郭晶晶同霍啟剛結婚就快7年，大家都知道，佢嫁入豪門霍家之後無繞埋對手做少奶奶，反而有司機唔用，自己搭大眾運輸出入；有傭人唔用，自己去超市買餸。呢一點，影響咗老公霍啟剛好多，令大家睇到豪門闊少，原來都可以過得好貼地。
郭晶晶生咗一仔一女忙於湊小朋友，買餸嘅重任不時交俾老公霍啟剛負責。早前霍啟剛單拖現身超市，見佢拎住電話講唔停，屏幕亦顯示疑似「JING JING」字眼，應該係接緊老婆柯打。
霍啟剛一邊聽緊老婆意旨，一邊推住車仔四圍穿梭，睇吓乳酪又買吓蔬果，全部都係健康食品。見佢手推車上又掛住件衫，睇嚟之前仲行咗轉洗衣舖。買完離開，原來佢仲自備埋環保購物袋添。以霍英東集團副總裁身份嚟講，佢嘅行為同細節真係好接地氣。
原因，可能只係因為愛妻咁簡單。據聞郭晶晶生完第一胎後，霍啟剛上網學煲粥俾老婆食；郭晶晶多年運動員生涯刻苦耐勞，婚後繼續過住節儉生活，好多事都親力親為，霍啟剛亦學習配合老婆步伐，落手落腳做埋一份；如此種種，唔單只係兩公婆嘅事，或多或少亦為霍家建立起正面形象，唔似一般豪門生活咁離地。
除咗愛妻，相信郭晶晶個人魅力亦係要素之一，而魅力唔一定係外表。雖則郭晶晶份人較為隨意簡樸，但喺感情問題上都算幾強勢，有自己嘅睇法，例如據聞霍啟剛當年勞師動眾展開追求，晶晶身邊人見到都叫佢咪走雞，但晶晶反而唔鍾意咁大排場，唔只一次話：「至於嗎？他是豪門，我可是冠軍。豪門很多，冠軍可沒幾個。」咁樣嘅晶晶，令霍啟剛都曾坦言：「對我嚟講晶晶係個寶藏。一開始嗰陣，我鍾意佢堅強、沉穩同冠軍嘅光環，但相處耐咗，我仍然可以喺佢身上發現能夠打動我嘅新鮮物事。」
來源 source: http://nextplus.nextmedia.com
|
鍾意就快D Share啦！
|
|
|
