藝人沈卓盈（Jess）與拍拖3年經營內衣生意的圈外男友Calvin於2月16日在泰國布吉「閃」婚，去年更先到英國和法國影婚紗照。 已成為杜太的沈卓盈中午到樂富出席活動，她以運動背心上陣大玩遊戲，期間險些被絆倒，幸有驚無險。講到閃婚，沈卓盈表示：「唔係，本身諗住喺今日白色情人節畀個surprise大家，趁住活動自己親口同大家報喜，點知已經畀人講咗出嚟，不過唔緊要，都係開心事。（雙喜臨門？）唔係，你見我咁fit就知唔係，自己比較傳統，鍾意按部就班，生BB就隨緣，因為啱啱先自由身，都想喺事業上衝刺一下，都會有啲電影試鏡。（不設防造人？）努力工作先。」
爆老公早過自己先爆喊
沈卓盈的婚禮全程在布吉進行，她指由於想低調舉行，故只邀請了屋企人及兄弟姊妹團前往，姊妹團是識於微時的好友，包括陳自瑤、何傲兒、黃芳雯與髮型師等六人組成。接新娘時，沈卓盈準備了「蟲蟲茶」招呼一眾兄弟，最初眾兄弟也不肯就範，但最尾亦屈服。問到新郎哥可有許下愛的宣言？她說：「有，啲姊妹準備咗畀佢，同埋佢都畀咗好多surprise我，又放煙花、又放天燈，佢唔識彈琴，仲秘密練兵去學鋼琴，彈咗首『小幸運』畀我聽。（有冇感動到喊？）好冧，行禮嗰陣都好感動，媽媽拖住我入去，我都忍住眼淚，佢比我更早喊，但係去到讀誓詞真係好感動忍唔住喊。」沈卓盈又指未決定會否在香港擺喜酒及Honey moon地方，隨後再打算。
問到「少婦聯盟」一班朋友事前不知道她結婚，會否不開心？她說：「佢哋會明白，自己想低調，唔想大搞，都係請屋企人去，好多親友都未知， 遲啲再約佢哋食飯。」講到在歐洲拍攝的婚紗相十分性感，沈卓盈坦言為要影婚紗相而keep fit，因一生人一次，所以希望以最佳狀態拍攝婚紗相。
公開最新婚照
另外，沈卓盈又公開幾張最新婚照，見佢着上包括中國傳統裙褂、紅色Low cut晚裝及白色Deep V婚紗，手上戴有6對龍鳳鐲，頸上又掛有大大隻金豬，加埋一對新人手上嘅豬公仔，似乎二人都好想趕住生豬仔啵。
大笨鐘取景靠執圖
此外，沈卓盈與老公去年在英國倫敦大笨鐘影婚紗相，但有心水清的網民質疑上年大笨鐘還在大維修，質疑怎可能取景。而沈卓盈就直認是執相，她笑說：「婚紗相係舊年年尾影，拍攝地點係攝影團隊帶我哋去，去到時大笨鐘的確係圍咗鋼條。攝影師後期好好心機幫我哋執相，執到好乾淨，執咗出嚟效果都好滿意，都有諗過大家會唔會為意，自己都有保存原有照片。」
|
鍾意就快D Share啦！
|
|
|
