藝人湯怡今早為無綫劇集《極道怪咖》於銅鑼灣鬧市街頭，冒雨拍攝被淋紅油戲份，吸引大批途人舉機圍觀。見湯怡一臉緊張，正式埋位前不停同導演、負責淋紅油的演員試位，確保能一Take Pass！
着定泳衣打定底
湯怡受訪時表示好緊張，同時大呻當全劇組得悉她有被淋紅油戲份都好開心、興奮：「我平時對佢哋都唔差，點解要咁對我？因為啲紅油係番茄醬溝水，佢哋個個都話要買定薯片點嚟食，想報復我咁！尋晚都唔係好瞓到，開早都係特別多嘢諗。」續指有為拍攝做好預防措施打定底：「着咗件泳衣喺入面，劇組都好好，拍完有安排架車車我返屋企梳洗，都預咗全身濕晒，由頭淋到落腳。」
問到為何會被淋紅油？湯怡劇透指：「戲入面我係飾演中學老師，但有社團背景嘅爸爸就想我做社圍大佬，又得罪咗蔣家旻。（希望一Take過？）想呀，濕晒都好難再Take。（好大壓力？）還好，但要諗定啲反應。」
預告拍大尺度「裸睡」戲
戲中與王浩信有感情線的她透露日前已拍了一場親吻戲，要替對方澄清同張振朗段「HEHE情」：「拍咗輯一模一樣嘅親密相同片，全部都唔係借位錫，大家都好緊張，拍嗰陣都有心跳加速。（尷尬？）還好，我戲裏戲外都好怕醜。」更預告下星期會拍攝醉酒床戲：「要裸睡咁，都幾Sexy。（大尺度？）喺電視上都OK大，幾激烈！（咁大尺度會尷尬？）好彩唔係一開戲就拍，同王浩信都熟絡咗，佢仲帶動我好多。」
講到今日是白色情人節，收工後可佳人有約？湯怡笑笑口承認有約會：「約咗班姊妹！（想拍拖？）隨緣但做女仔都係想畀人錫。（會玩相睇Apps？）咁又冇，但身邊有朋友玩完就開花結果。」
來源 source: http://hk.on.cc
|
鍾意就快D Share啦！
|
|
|