索媽張名雅自去年底誕下細仔Milo後，首度現身出席珠寶展，生完兩個月B的她身材依然Fit到爆，十足十未生過一樣，果然得天獨厚！她表示距離未生前仍差8磅，現時返公司開工都有好多人指她收身成功，就連老公都質疑她搵代母：「佢成日都係度講笑，又有人問佢係咪餓瘦我，但其實係自己有努力，有做運動，坐月又唔可以周圍走，同第一胎一樣有安排紮肚、做機。」
冇咁堅持餵人奶
她指雖然現時都有餵人奶，但就比上一胎沒那麼堅持：「上胎好堅持全人奶，返公司拍戲要搵位泵奶，一放Lunch我就失蹤，今胎就有配合用奶粉，做得幾多得幾多，唔使咁大壓力都放鬆咗好多，心情都冇咁緊張，試過就有經驗。」對於陳凱琳未坐完月就「出關」接Job，名雅都大讚對方好勁：「大肚見佢都好Fit，生完又好似冇生過咁，傾偈發現我同佢個B出世都係6磅幾，正常Size唔係細粒B，但佢都仲瘦過我。（但未坐完月係咪最好唔好吹風？）避免到就避免，但有時都唔好匿喺屋企，我媽咪都好開通，我要出去行吓佢都冇所謂，唔好凍親就得。」
細仔好識笑
問到現時望住細仔就開心晒？她指Milo最叻賣笑，是個開心寶寶：「佢依家開始畀到反應，最明白『笑』，個個一叫佢笑就笑。（哥哥有呷醋？）初初都有啲，佢唔知細佬係BB，成日見到我個肚，就以為細佬係個肚，人無視佢、當佢透明，但依家好好多習慣咗，知自己係大哥哥。（想追番個女？）唔諗住啦，過多6、7年先算，本身都想追個女，但冇得揀，2個都夠。」
來源 source: http://hk.on.cc
|
鍾意就快D Share啦！
|
|
|
