視后胡定欣憑首部參演的電影作品獲提名金像獎最佳新演員。
藝人胡定欣去年踩過界殺入影壇，首次拍電影就入圍金像獎角逐「最佳新演員」，她坦言得知入圍時，感覺奇妙：「好開心有機會提名，收到消息時我喺街，聽到之後個腦Flash Back番入行以來十幾年嘅重要畫面，好意想不到。」
問可有信心奪獎，定欣坦言一半半：「要睇評審嘅方向，我喺電視圈唔係新人，但電影圈係第一部戲，有份提名已經係好大得着，得唔得就平常心。（諗定得獎謝詞？）都會準備，因為唔可以失禮，怕到時個腦一片空白。（點睇其他對手？）我冇睇晒其他入圍演員嘅作品，不過之前喺其他電影頒獎禮Crisel Consunji都有得獎，好戥佢開心。」
入行十多年 從未客串
定欣自覺幸運，有幸加入影壇參與拍攝，提名更是意外收穫，一切都歸功合作過兩次的拍檔吳鎮宇：「當初係鎮宇搵我，仲要咁啱我有檔期。其實我都係跟住佢，睇住佢點樣做，佢畀到安全感我，佢嘅存在已經幫咗我好多，對我好重要。」
在電視圈經驗豐富的她由視后變成電影圈新人，問可會尷尬？定欣稱初時也有質疑：「最初佢哋話想提名我，我話得咩？原來只要我從來冇演出過電影就可以，所以係一個緣分！咁多年來，都有人想搵我客串，但未能成事，如果當日我係有客串過，今日就冇得提名，所以係安排好咗，將我放喺一部咁好嘅電影，開始我嘅第一次。（唔抗拒做新人？）我喺電影圈係新人，好多嘢要學。（演技上唔係？）我要進步，仲有好長嘅路。」
服裝：Stella McCartney@Lane Crawford
化妝：Cyrus Lee
髮型：Matt Chiu@Xenter
場地：宿宿醉
來源 source: http://hk.on.cc
|
鍾意就快D Share啦！
|
|
|