香港電影金像獎頒獎禮後日舉行，黃秋生憑《淪落人》精湛演出，以大熱姿態角逐第3個金像獎最佳男主角。回想33歲首奪金像影帝後，秋生自言衰足3年，幾乎被斷米路。後來2014年秋生因撐雨傘運動被「五毛黨」圍攻，不過他自言是legend（傳奇），面對所有說過或被屈說過的言論，他都無畏無懼。
採訪：何永寧
攝影：郭賢興
相關新聞：【圈中唯一】集齊影帝視帝劇帝
現年57歲的黃秋生曾在1994年及1999年兩奪金像獎最佳男主角，今年他憑電影《淪落人》在香港電影金像獎爭第3個影帝。秋生早於94年已憑《八仙飯店之人肉叉燒包》的殺人狂角色首奪金像影帝，可惜之後足足衰3年，他日前接受《蘋果》訪問，解釋原因：「因為第一次攞通常都好後生，攞咗正常人對自己事業、行業有所要求有夢想，一個有夢想嘅人進入一個冇夢想嘅行業，通常都會出事。」
| | |
有要求出事
秋生認為是自己「有要求」出事：「你有要求，人哋冇。人哋係撈，去到片場咪同人拗囉。你拗人哋咪話你麻煩囉，嗰時開始你有好多戲唔拍喇，呢啲又唔接，嗰啲又唔接，可能價錢又提高，你又麻煩、價錢又提高、又有好多嘢唔接，你咪衰3年囉。」他笑言首兩年事件傳揚開去，第3年他才開始「知錯」：「知道錯嘞，咪同人講『我都撈㗎』，到第4年咪有番嘢做。」99年秋生再憑《野獸刑警》奪影帝，之後工作不斷，他特別多謝舊老闆林建岳先生：「嗰陣好多嘢做，特別係林建岳先生招攬我入佢公司，嗰時佢話：『大家食大茶飯』，佢真係咁講。」
相關新聞：姜皓文鬥影帝自詡「型咗」
大運後落雨
自言行運的秋生，直至2014年雨傘運動期間，因為敢言而成為眾矢之的：「大運之後咪『落雨』囉，你擔唔擔遮都死，我喺上海都冇擔遮。我唔單止dramatic（戲劇性），乜叫legend（傳奇）呀？就係生存喺傳說中，係一個神話。」秋生當時獨力面對網絡欺凌，回憶時仍然有火：「你睇希臘神話就知，佢（神話人物）冇做過，但係傳說中佢做過，我覺得榮幸呀。𠵱家所謂嘅五毛，嗰時係政府動員，一條友對抗全世界，你話幾犀利、幾巴閉。有講過、冇講過，全部算喺我頭上，成日話『以黃秋生為首嘅杜汶澤們，例如何韻詩等等』，都唔知乜嘢句子。」他自言作為演員，曾面對這種場面已經無憾。
其實傘運期間，秋生身在上海拍攝劇集《梟雄》，他甚為感觸：「有場戲好多人遊行示威，我俾人鬧賣國賊，喺現實生活中同時出現。臨尾場戲，講我返到香港法庭自辯，成頁紙劇本解釋番我做過啲乜嘢、冇做過啲乜嘢，你哋屈我做過啲乜嘢，最後就話隨便你鍾意點就點啦，嗰段我講得幾有感覺，戲如人生、人生如戲！」
城城冇人提
今年，秋生憑《淪落人》角逐第三個金像影帝，對於自己被視為大熱門，他笑言大熱門會「輸死人」：「輸死人呀，咁真係可能輸到傾家蕩產。我諗我應該係買1蚊賠你2蚊咁啦，咁上下啦。發哥就1蚊賠1蚊，我差啲嘅。黑仔（姜皓文）嗰啲1蚊賠1千，唔係睇佢唔起呀，不過真係輸死人吖嘛。城城，嘩！真係冇人提過佢咁滯喎，大佬，佢隨時1賠2千蚊，佢唔會啦，爆唔到咁冷呀，佢冷過黑仔。」不過講到老友、憑《逆流大叔》角逐影帝的吳鎮宇，秋生表示鎮宇是1賠1，跟他一樣熱門。
髮型：Taky of fifthsalon
化妝：Jolinn
場地提供：House 1881
|
鍾意就快D Share啦！
|
|
|
