【新增動新聞】
民陣今日發起反「送中」惡法遊行，遊行其中一個訴求促請推出惡法的林鄭下台，「中共黑手，林鄭早唞」之聲此起彼落。民陣副召集人陳皓桓在遊行前受訪，批評政府模糊焦點，轉移視線，一直無回應市民的訴求，他們非常不滿。他認為政府可以用單次協議方式處理台灣殺人案，根本不需要用這個方式修法。遭遊行市民要求下台的特首林鄭月娥，正在北京出席2019年世界園藝博覽會開幕式和相關活動，明天星期一回港。
多次出席遊行的梁小姐指：「政府修訂條例越嚟越無理，覺得政府成日都講大話，我覺得林鄭仲差過689，689得個講字但推行唔到，但林鄭樣樣做齊，DQ議員資格，佔中三子坐監啦，全部都有佢份。」
市民李先生稱對林鄭失望，「佢做得好差，DQ啲議員啦，同埋今次逃犯條例，擺明好似係任務咁，唔係為殺人案而做。梁振英年代，佢已經係幫中央政府做嘢，當年配合梁振英做埋啲唔得民心嘅嘢，學陳樞機話齋，我覺得林鄭唔係人，做嘅嘢罄竹難書。（點睇林鄭依家都未落台？）依家唔夠人多，七一我會再嚟。」
Philip則認為，林鄭施政完全沒有從港人利益出發，覺得政府人才太少，思考政策不周詳，「佢雙眼左閃右避，唔得老實」。對於有指修訂條例是林鄭一人想出來，他明言難以令人相信，「其實一向無寄望，邊個上台都一樣，覺得佢唔係咁好，係因為佢個人好陰濕，表面上講到樣樣為你好，但其實做嘅嘢相反，比CY更差，CY真小人，但佢仲惡毒，佢落台都冇乜用，不過盡吓人事啦。」
自言是中層公務員的蘇先生也上街抗議，他自嘲是「777手下」，但反對政府惡法。他指內地和香港司法制度不同，以往內地在港捉人都是靜悄悄，例如銅鑼灣書店，但當逃犯法例通過後，一切「阿爺話事」，可名正言順捉人。他慨嘆林鄭若果真的有權，應煞停逃犯條例。
結伴遊行的胡女士與袁小姐指，一日沒有普選，特首都無法由港人去揀，「林鄭係大話精，當初選話上帝感召，而家個政府真係好無恥」，她們批評政府官官相衛，對民主派卻重打重罰，鄭若驊自己有僭建官非，丈夫只輕判2萬元，但卻對黃之鋒等年輕人窮追猛打，是非常不公平，胡女士認為林鄭下台也不足以彌補她對香港造成的傷害。
梁小姐指聽到林鄭聲稱修例是憐憫，「聽完真係『頂唔順』囉！如果純粹係為一個罪犯，根本唔使咁修例，尤其台灣都唔願意咁做，變咗好似一個藉口咁，難以令人相信。一直我都冇相信林鄭，特首小圈子選舉大家心照啦，佢嘅出現都係被欽點，唔係我哋市民想見到嘅人，特首一屆比一屆差，越來越表現到佢哋唔係為香港人服務，係為中共服務。」
彭先生說：「林鄭聽教聽話，上面叫佢做乜就做乜，選到佢出嚟係香港人嘅不幸，當然亦唔係我哋選。佢全部諗住上面要做乜，就雙手奉獻，冇為過香港人。其實而家香港人好被動，邊個上台都難避免，因為受制於國內，就算選得上都唔係自己想選嘅人，最重要都係表達到香港人嘅意願。」他希望自由空氣繼續存在，「自由空氣係香港人、甚至全世界人都渴望嘅嘢。」
學生楊小姐認為現階段任何人上台都不會改變現時結果，不過對於有指一切修例是林鄭個人意志，她不表認同：「點會唔關中央事，林鄭係中央欽點落嚟，照理政策佢都係聽中央話。修訂逃犯條例好似將內地法律同香港融合，一國兩制界線模糊，唔係只有犯罪嘅人先受影響，擴展開去任何人都可以受牽連同有關，憐憫說法只係一個謊言。」
不願上鏡的劉小姐認為，林鄭在修例一事上是出賣了香港人，她相信林鄭也沒有意識會下台，否則不會推出惡法，而大家要求她下台她也不會下台，也難想像換另一人推修例是何種光景，她形容林鄭和梁振英是兩種作不同惡的人。她認為如果香港人有普選有選擇，相信執政者的獨裁觀念至少不會如現在般強。
民陣4.28反送中條例遊行
日期：4月28日（星期日）
集合地點：銅鑼灣東角道（下午3時集合）
起步時間：下午4時
遊行路線：銅鑼灣東角道至立法會
資料來源：民陣
-----------------------------
追蹤真相 守護公義
按此免費訂閱支持蘋果 無阻盡覽
https://hk.adai.ly/MtYhca7WTV
---------------------------
星期一至五晚上10點半
《動腦Q》Let's Q the money！
http://bit.ly/2QW8LcI
|
鍾意就快D Share啦！
|
|
|