《封神榜》有殷十娘懷胎三年零六個月生哪吒，而家有諸葛紫岐肚未大就生咗第二仔，現代神話嚟㗎？
今年一月出席活動嘅諸葛紫岐仲未見肚，但日前突然就話喺加拿大生埋，兼返到香港坐緊月，令唔少人詫異！或者有人會話：「但佢本身纖瘦窈窕，可能真係佗得唔顯肚呢，加上一月現身時條紅裙鬆身，唔突肚唔出奇。」咁，回帶睇返佢第一胎懷孕7個月嘅相，肚大如籮喎。
另外，《壹》仔喺2018年12月左右，亦即係諸葛紫岐第二胎懷孕近6個月左右，巧遇過佢湊住大仔，同傭人姐姐一齊行商場歎下午茶。按照佢2019年4月生第二胎推算，當時佢應該都有6個月左右身紀。諸葛紫岐雖身穿長袖冷衫，但目測相當鬆身，冷衫內亦空蕩蕩，唔似暗藏近6個月嘅胎兒，而且面無二兩肉、下巴「尖不甩」、手指幼細，一啲都唔似孕婦。
再望望佢下半身，攝住咁厚嘅冷衫入牛仔褲，成條褲頭都show埋出嚟，但莫講話唔見6個月肚，連少少肚腩仔凸出嘅弧線都無，平㗎！無論前後還是左右睇，諸葛紫岐都fit到漏，當時真係佗緊近6個月肚？借用周星馳電影對白：「（我信呀！）我唔信你信。（你信我啦，我信㗎！）」
BTW，除咗今次未見肚大已經坐月令人嘖嘖稱奇之外，諸葛紫岐以前都有過一件事令人難忘，就係「1人6證10個名」。2011年，有人向傳媒提供6張內地居民身份證影印本，證上肖像全是諸葛紫岐，出生日期都是8月20日，但年份全部唔一樣，而且6張證分別有6個不同名字，若加上原名諸葛一蘇，入行後改名諸葛梓岐、諸葛紫岐，以及曾有傳佢一度取名諸葛逸樺，大大話話一個人有10個名。
來源 source: http://nextplus.nextmedia.com
|
鍾意就快D Share啦！
|
|
|