演慈母出色、做辣奶奶又掂嘅Madam盧宛茵，經之前本刊報導佢同撞樣衛蘭一樣咁唱得之後，66歲終於追夢成真，近日宣布八月舉行演唱會。
「係好開心，因為真係諗都諗唔到，而家幾十歲人，竟然可以夢想成真。」Madam說。
早前拍攝演唱會海報，佢揀咗偶像徐小鳳造型致敬。不過要扮小鳳姐，最難度高嘅當然係，如何扮佢廿三吋腰！
一著起小鳳姐經典造型嘅波點裙，Madam一額汗:「嘩，好在著得落，深呼吸先。佢條腰咁幼，我好想有佢條腰，睇下到時闢穀、斷食減肥得唔得」
之後在鏡頭前一舉手一投足，都十足小鳳姐上身。原來幾十年前，盧宛茵到澳門登台時，跟小鳳姐有一面之緣。
至於另一造型，又點少得被網民譽為她們是娛圈失散母女的衛蘭。Madam一身電單身造型，唔使講，梗係演繹黎明形容衛蘭嘅金句:「肥過部電單車。」，呢個造型易掌握好多。
「其實我好欣賞佢，人又靚，唱歌又好聽，聲線又甜美，好nice，俾人印象係好樂觀和藹。」問佢想唔想公開邀請衛蘭做嘉賓？Madam就話:「好呀，希望你(衛蘭)可以教吓我啦，你唱歌咁叻，我無你咁叻，大家可以研究吓！我好想同你合唱。」
當知道有人幫佢開演唱會， Madam開心到失眠。
「有人話同我搞一個騷，我開心到不得了，即刻度定要唱咩歌，到時又跳唔跳舞？即刻瞓唔著，瞓覺都諗住有咩新構思，好想做好個騷。能夠夢想成真，我真係完全無諗過，因為一直覺得開演唱會係屬於年輕人嘅事，諗唔到我呢把年紀都可以，喺香港真係好難得，但外國就有好多類似情況。」
幫佢實現夢想嘅，原來係老友鄭敬基。
「我好多謝基仔搵到今次嘅主辦機構，即係Henry，然後一齊見面，慢慢就傾好成件事，所以好多謝佢哋。」
經典處境劇《卡拉屋企》依家深夜重播，演活肥媽一角嘅Madam即將開騷，呢家人到時亦會上台撐。除咗聽佢唱歌，到時Madam仲會論盡婆媳關係，又為公屋潮文一事平反，佢話會同觀眾好多互動。」
採訪:Sukey Lo
攝錄:吳斯金
攝影:Raymond
來源 source: http://nextplus.nextmedia.com
|
鍾意就快D Share啦！
|
|
|
