美容院投訴個案每年多達千宗，當中消委會點名的美容院以不良銷售手法劏客情況越見猖獗，雖然去年有美容中介被判罪而成為首宗案例，但《蘋果》發現黑店惡劣手法並未收斂。近日在旺角街頭，一批夾着手提包的美男團出沒，並以旺角商廈單位作「心戰室」在內裏上網於各大社交平台媾客，以「陪我做facial」或「同你relax吓」，冧掂一個個寂寞的心去facial，結果不少人遭美容院劏到一頸血碌爆卡購買巨額美容療程。《蘋果》花一個月追查，揭發一班「美男團」不但大騷孝順和有愛心的冧招，更不惜出動價值200萬元瑪莎拉蒂跑車作道具，務求引獵物上釣。短短數個月已有多人中招，至少10人向區議員求助，涉款達60萬元。
記者：莊建鑫 黎少英 阮斌 劉敬德
近日每逢下午3時後，旺角朗豪坊附近傳出「轟轟」聲的引擎巨響，一部價值200萬元的白色瑪莎拉蒂招搖過市，違例泊於上海街萬事昌商業中心外，不時引來途人的目光，即使被抄牌，車主仍面不改容。《蘋果》連日追查，發現該跑車車主Simon正是在網上臭名遠播的美容中介，專門在各大社交平台出擊，以富貴暖男形象打動不少寂寞男女的心，他們更會化身女神新兵種「美容兵」，將「女友人」逐一帶上美容院，結果被「劏到一頸血」。
記者追蹤下發現，居於旺角波鞋街新豪宅SKYPARK的Simon，每日到萬事昌商業中心上班僅約5分鐘路程，都會揸瑪莎拉蒂超跑現身，而且形象百變，一時是Hip-hop造型，一時就變身金融MK，架上眼鏡、周身名牌再配男士手提包；間中更會以格仔恤衫乖仔look出現。Simon每日幾乎「三點不露」，返到辦公室終日無所事事，游手好閒，一會兒到附近遊戲中心打機，一會兒去睇牙醫和買髮蠟，又或食個下午茶醫肚，但他身邊總有幾名年齡介乎20至30多歲，打扮儼如金融MK的男子三五成群出沒，他們高矮肥瘦身型都有。原來這班「美男團」都是美容中介，利用萬事昌商業中心辦公室作「心戰室」，專心在交友平台發功，然後透過WeChat或WhatsApp繼續冧客，每當有獵物上釣，就會相約對方在朗豪坊見面。
而「美男團」劏客黃金時間，就在每日傍晚，即打工仔放工時間及周六、周日。每當美男團在朗豪坊迎接客人後，一般會在附近飲咖啡，或甫見面即以「booking夠鐘」為由，打鐵趁熱，將客人帶到一街之隔的上樓美容院。記者發現，「美男團」平均每日4、5人返工，每人至少拉1名客人到美容院，以試做價做一次療程，5人當中約有3人「落疊」，一般逗留約1至2小時才由美男送走，而「冇幫襯」的客人則約逗留半小時自行離開。
其中一次，記者見一名長髮女子被肥仔美男帶到美容院後，不足半小時便慌忙跑落樓離開。記者上前了解，對方直言：「一上到去就覺得唔對路，有6、7個女人打扮得好靚圍喺度，我就知係呃人㗎！」醒目的她未有聽完職員介紹，就奪門離開。
不過中招的男女多不勝數，39歲港女Kerry於去年底透過交友App認識Simon：「佢冇提過自己做美容，我只係知佢生活質素好好，佢間屋好靚，有令人好羨慕嘅車、手錶，令我覺得將來同佢一齊，我生活都會好。」由於Simon炫富有一手，除大曬其超跑外，還有坐遊艇出海，經常到高級餐廳食好西及到美國睇NBA，此外對方又化身「美容兵」，不但噓寒問暖，還會以「放假當然係想同你開開心心咁過」、「我plan吓有啲咩節目可以同你一齊享受嗰刻嘅時光」，令她放下戒心，跟隨到美容院，並以試做價2,300元即場做facial，但好戲在後頭。
其間，美容師大讚Simon：「話佢第一次帶女仔上嚟，問我係咪佢女朋友，當時我好開心，覺得可以發展。」之後職員推介價值13.8萬元的60次美容療程，Kerry根本無力支付，對方就着她先買30次，價錢減半約6.9萬元，正當她猶疑之際，Simon使出致命一擊：「佢話如果你唔參加，就唔當我係男朋友。當時我嘅心好想佢做我男朋友，如果我唔參加，佢就唔會認定我係佢女朋友。」誰知碌卡後情況大逆轉，Kerry再無法聯絡到Simon，手機App亦被block了，她始知受騙。
29歲才拍過一次拖的Kerry，一心遇到真命天子，卻換來一身卡數，在超巿工作的她月入僅13,000多元，將所有積蓄清還卡數，仍欠2萬多元：「我諗住到我呢個年紀，係時候拍拖結婚，所以我先會嘗試上網識人，我而家旺角都唔敢去，去到就會諗番起自己點解咁蠢。」
而另一受害人P小姐則認識另一肥仔「美男」駿揚，同樣被對方炫富手段打動芳心：「佢成日一身名牌，又揸靚車，但就無講過自己係中介。」首次試做facial後，她即場買下萬多元療程，之後駿揚每次都化身「美容兵」陪她美容院，「每次都話有優惠sell我，又不斷話『大家係friend，幫吓我』。」她無奈再加碼，至今欠卡數3萬元。
不過有不值這批美容中介所為的「美男」向記者大爆料，他去年曾被招攬入美男團大軍，每天到「心戰室」上班，然後有人會教授媾女技巧及在交友App開戶，「會教講嘢技巧，會教點樣打扮自己！」他透露，美男團多勞多得，按客人購買療程的費用拆賬，每張單分佣一成，「1萬蚊拆1千蚊左右，10萬拆差唔多1萬」，因而美男團在網上獵客從不手軟，不分男女，不分年齡。他直言，團隊內有不少「金牌美男」，他們每日至少有3個客，有人一張單分佣數萬元，月入近百萬元。
-----------------------------
星期一至五晚上10點半*
《動腦Q》Let's Q the money！
http://bit.ly/2QW8LcI
---------------------------
你敢爆，我敢獎！ 立即WhatsApp《蘋果》24小時爆相爆片熱線或致電：63836568
| | | |
| | | |
| | | |
| |
|
鍾意就快D Share啦！
|
|
|