要不是上月尾登上雜誌封面，拍得她在中環貼街招（內容很迂迴，提及無綫一位中層如何受到辦公室政治迫害，其後自殺收場、另又提及「陳公公」疑似影射陳志雲等等），大概一般市民大眾不會記得她──劉倬琦，才醒覺這位「幾眼熟」的97年落選港姐，又「出返嚟」有新聞了。
劉倬琦是新的藝名，一年前仍是大家睇慣的「劉綽琪」，英文名叫Patricia、本名劉依清的她，自身故事的曲折，遠比她的娛樂圈發展史精采。例如私生女的家世、14歲親眼目睹母親在家中上吊自殺、2015年在網上自爆嫁了老外，老公兩年後卻因淋巴癌不幸病逝……幾乎可拍一齣悲天憫人的苦情片，又愛又恨有血有淚。
不過，44歲的劉倬琦說：「我有段時期係喊唔到……喊唔到我諗係麻木咗，覺得人生係咁㗎喇，過得一日得一日，嗰段時間我好似迷失的羔羊，好冇安全感，邊度係我嘅家呢？」
她說：「流到眼淚嘅人呢，你都仲有希望，到咗欲哭無淚嘅階段嗰陣，你就知道有幾慘喇！」
欲哭無淚可能比較文雅，好多時候，直接啲講，叫喊都無謂。
撰文：文嘉龍
攝影：梁志永
我太早經歷死亡
只要劉倬琦一開口，她可以一口氣不停講不停講，只是越講嘴角就開始有點抖顫，「啲人話我吸毒喎，如果吸毒吸到我咁精靈就好囉！」她真正有癮的，是可樂癮，「我好鍾意飲可樂。」訪問期間，她已飲了兩罐無糖可樂。仍需要食藥嗎？劉倬琦說，香港地好多人都有抑鬱症，但她說鎮靜劑藥物，現在已經不用食了。
藥不用食，但憂鬱仍在。訪問中，劉倬琦提得最多的，是「死人」，由翁美玲黃霑講到梅姐哥哥再到藍潔瑛盧凱彤，「at17有個女仔（盧凱彤）都係跳樓自殺，我唔識林二汶啦，但我覺得佢答嗰句好正常，佢話有朋友問佢：『Are you OK？』佢答：『I will never be OK！』Same！尤其是嗰個係你親人，嗰個疤痕係永遠都喺度嘅，但你選擇望住個疤痕喊呢，定係同自己講，我要爭氣做人，我要逆境自強，我要能屈能伸！」
當然，明星自殺怎及親人自殺般傷痛，尤其親歷其境。「想自殺嗰啲人係好早已經有呢個諗法，係睇吓幾時去實行，等於我媽咪喺自殺之前特登請咗一個星期假，同我去咗好多地方……佢亦同我講咗一句說話，『樹欲靜而風不息，子欲養而親不在』，佢話諗起佢媽媽，即係我阿婆，跟住我feel到佢有唔開心，因為佢嗰時已經有抑鬱。我爹哋嗰時一年都唔知有冇兩、三日喺香港，我媽咪好靚，英文非常之好。我問咗佢一句：『哎吔，自殺嘅人係咪會落地獄㗎？』以前情緒病患者好少會講畀人知，覺得係一件羞家嘅事，我媽咪嗰時嘅社會風氣仲係冇咁多人肯出嚟講。佢有嚴重鼻敏感，我都有遺傳咗。」她再補多句：「我媽咪靚過我好多！」
劉倬琦小時候家住跑馬地，只得她與母親兩人。「你要記住吓，我細個住Happy Valley，唔代表happy㗎吓！」母親自殺後半年，一直在美國有家室的父親安排她到夏威夷留學，「衰啲講句好似孤兒仔咁，我寧願我喺保良局都唔跟我爹哋去美國！」97年回流選港姐、08年聲稱要去荷李活發展又走了，「人一世物一世，都想要去一次夢工場！」到了去年2月又再一次回流香港定居。
「我阿爺係二世祖」
劉倬琦是私生女，她爸爸和正印一家一直在美國居住，媽媽是余兆麒（中國聯合銀行創辦人）的私人秘書。「我諗任何一個女人嫁咗一個老公呢，一年都見唔到個老公呢，係點都會唔開心嘅。我爹哋都幾叻嘅，我哋家族喺內地經營銀行，我諗係我阿爺之前嗰幾代已經經營銀行（在上海），我阿爺係二世祖，playboy嗰種，我阿嫲同余兆麒將軍個老婆係同學，我阿嫲落到嚟香港帶住我爹哋嗰時，教過吓書嘅，之後先至移民去美國，我阿嫲英文好過中文，佢喺名校華仁定皇仁教過書。」
14歲親歷母親自殺，劉倬琦說自己太早經歷死亡，有點麻木。母親死後不久，生父安排她到夏威夷讀書。「我去到夏威夷一落機先知，佢原來同個大婆離咗婚，同咗一個鬼婆結婚，我係有一個細過我十幾年嘅妹，係mix嚟嘅，嗰吓打擊先大！人喊得到呢，都係一種抒發，我有一段時間係喊唔到，欲哭無淚嘅感覺！」
人一世物一世嫁一次囉
與父親的關係，又愛又恨，「我同我爹哋嘅關係，可以點樣形容呢？係又愛又恨，始終佢係我爹哋，佢對我媽咪唔好，係佢花心啫，佢唔覺得有問題，佢係令到佢身邊嘅仔女唔開心、佢嘅女人唔開心，佢自己最開心，佢某程度嚟講係一個好自私嘅人。」
劉倬琦08年離開娛樂圈，聲稱要到美國荷李活發展，有另一個說法其實是要去探望在美國年事已高的父親。「咁我始終係佢個女，佢始終係錫我嘅。喺佛教嘅角度，有啲人係嚟還兒女債嘅、有啲人係嚟還父母債嘅，咁我覺得我係屬於還父母債㗎！有一樣嘢我覺得我爹哋係幾風趣㗎，佢嗰時身體唔好，要食降膽固醇藥，佢同醫生講，『我點解要戒口啫，你都叫我食膽固醇藥咯』，佢個道理好啱㗎，佢係歪理王嚟㗎，如果我係個醫生呢，我就落重劑㗎喇！」
「留低嗰個先至慘」
花心的爸爸，多年來卻對劉倬琦兩母女的物質生活，從來冇手軟，「錢係買唔到快樂，我只可以咁樣答你，但錢又不能冇喎，因為貧賤夫妻百事哀……有時啲嘢係預計唔到嘅，佛學角度可以講係前世今生啦，科學角度嚟講就每個人身體入面都有癌細胞……你要記住節哀順變，有生必有死，某程度上，化得嚟又唔可以熄咗道火！」
母親自殺、父親病逝，還要面對自己的另一半離開。劉倬琦說，其實同外籍老公識咗好多年，09年劉為一個在美國讀電影要拍片交功課的朋友做幕後工作，與同樣幫朋友手做幕後的老公，一拍即合。「我哋09年識，佢又幫手（拍片）、我又幫手，一直都交往，到佢病之前，我年紀唔輕，不過佢細過我。女人歲數有個統計係長命過男人嘅，如果一對夫妻係真心相愛嘅，你係希望對方死先過自己嘅，因為留低落嚟嗰個先至慘。」
劉倬琦說外界很多人誤解，以為她知道老公有病，才決定下嫁的。「因為我係私生女，所以結唔結婚對我嚟講冇乜所謂，不過人一世物一世，咪嫁一次囉，結畀你睇，行埋嗰步，叫正正式式有個交代畀自己。唔係話病唔病嘅關係，只不過一直有呢個打算，我哋唔想俾一個婚姻綁死咗自己，唔想為一個婚姻制度去做一啲嘢，但係我作為一個女性，想影張婚紗相靚靚哋，唔係因為一張婚約，因為我同佢嘅承諾一早已經在心中！到知道佢有病，我覺得係交代，叫做嫁咗出去囉，就係咁簡單！啲人話，嘩，你明知佢乜乜乜都咁，我09年識佢㗎喇，其實中間我哋都有事發生過，我哋試過分開過！」
想過再結婚嗎？「當然希望再遇到另一個伴侶，唔係結唔結婚，係想有個伴侶，係希望嘅。」
從來都同陳志雲先生唔熟
面對至親離世，說到欲哭無淚，劉倬琦說了句坦白得來又幾好笑的說話，「我拍戲嗰時咪成日俾人話演技差嘅，係因為我真係拍唔到喊戲，流唔到眼淚，私生活又好、拍戲又好，都流唔到眼淚。」的確，大家對劉倬琦拍戲的印象無幾，比較說得出口，是她和阿姐汪明荃演母女的《識法代言人》，她06年跳槽亞視拍過的《義無反顧》，即使有戲外是非，例如投訴對手海俊傑鹹豬手，或大爆主角Deanie姐葉德嫻如何專制，都掀不起甚麼話題。
「好想拍一啲喜劇」
97年港姐三甲是翁嘉穗、李明慧和佘詩曼，劉倬琦落選一年後，才獲無綫安排sit-in藝員訓練班當旁聽生，當年的藝員訓練班同學有林峯、楊怡等人，輾轉22年，去了美國又回流，其實今次「復出」想得到甚麼？「我鍾意做talk show，可以發表自己意見，叫我對住份稿照講，𠵱家興趣不大，啲人話去美國係咪發展唔好，我想講𠵱家就算你去到非洲，只要你上到網，你就可以做你自己想做嘅嘢。我好想拍一啲喜劇，年年都仲係睇緊《家有囍事》……」
發生被偷拍在中環貼街招，內容提及無綫前中層自殺一事，又出現「陳公公」的化名疑似影射陳志雲，劉倬琦稱已經與律師商討採取法律行動，她說：「我從來都同陳志雲先生唔熟㗎，係以前《K-100》個監製問我『做咗啲乜嘢令到陳志雲唔鍾意你呀』；何麗全先生就係舊年出席一啲場合撞到，到佢哋搞亞姐，同我傾，又話想簽我經理人約。」
現在的家？一個人租住沙頭角的村屋單位。據劉倬琦說，原先有一個網上OTT平台找她主持合作的，又如原先亞視有斟過她為亞姐選舉做司儀和想簽她經理人合約的，其後統統都沒有下文了。「我𠵱家手頭上有幾個project搞緊。」她說正在埋頭寫劇本。
劇本可以預設，但人生不似預期，正如今次「復出」發生的荒誕貼街招事件，問她畀人感覺好似好癲咁，有冇唔開心？「最唔開心嘅嘢，係一啲我識嘅朋友話，我好想見番以前個Patricia呀，死啦，點算呀？佢咁樣咁樣……」
【後記】挪威監獄與瑞士精神病院
同劉倬琦傾偈，你會發現她思維好跳躍，講亡母會講埋翁美玲，講喊唔出又會講埋藍潔瑛，講經歷死亡又會跳去講Stephen Hawking，連全球暖化問題都要講埋……她又會在拍照期間問攝影師，「知唔知中東賣遮點解？（攞嚟搞）」，又會捉住你隻手然後問「我同你𠵱家兩隻手一齊擺落個煲度打邊爐，係咩？（淥死誰手）」……
其實，有乜要講，有乜可以講、有乜講不得，她好清楚。
劉倬琦說，最理想的退休生活，係移民去挪威然後犯案，咁就可以被送入去有如五星級酒店環境的哈爾登監獄；有精神病咩？她說千祈不要送她去青山，她想去的，同樣是服務設施俱備的瑞士精神病院。
「你可以話我癲，但我唔係藍潔瑛嗰種癲，我呢種癲，係叫另類癲。」劉倬琦邊說邊大笑。
場地提供：M2 Home（皇室堡）
|
鍾意就快D Share啦！
|
|
|
