緊接《福爾摩師奶》嘅九點半檔新劇《鐵探》，首集播出時相當吸引，就算撇除惠英紅、姜皓文等非大台演員嘅個人魅力，套劇一樣有可觀性，例如實境拍攝油尖旺有港產片味道；警匪追逐、鎗戰駁火以及細路女被挾持，能令觀眾睇得肉緊，節奏十分緊湊，一個鐘頭話咁快就過。
進入第二集，本來都維持到首集嘅優點，可惜到咗第四節，大台劇慣性缺點立即出現，就係喺唔恰當嘅時候加插回憶橋段，意圖深化楊明同蔡思貝嘅感情線。
不過，如此刻意，觀眾唔單只睇得唔肉緊，反而認為成個劇情同節奏被拖垮。事關套劇只不過播咗兩集，觀眾連角色名都未必記得住，更莫講話對角色有感情嘅時候，就想觀眾透過回憶橋段體會到楊明同蔡思貝之關嘅牽絆，未免太天真。最後結果，反而係觀眾投入唔到感情，更令之前營造嘅緊張氣氛徹底斷送。楊明同蔡思貝嘅感情線，仲會因為開衰咗個頭，而落得「未見官先打八十」嘅局面。
其實都係一啲老生常談：角色間嘅感情係要透過情節「滲」出嚟，讓觀眾自己去感受，咁先會令觀眾對一個角色產生情感，而唔係透過回憶橋段等方法夾硬話俾觀眾知。呢種填鴨式方法，係大台劇講述人物關係嘅一貫敗筆，其實做唔到「滲」嘅效果，不如直接放棄人物關係感情嘅營造，重回正軌集中返警匪對壘、伙計手足情仲好，好過強加感情線畀力捧中嘅親生仔女，增加曝光、推長集數，最後反而被唾棄，得不償失。
近期有睇過下大台劇嘅都feel到，頭幾集往往開得好唔錯，係吸引嘅，而結局亦唔再係BBQ式，有進步。但，中段充斥各種感情線、回憶情節等廢戲。《鐵探》第二集末段話咁快已經推咗楊明同蔡思貝出嚟，可想而知呢種情節喺往段劇情都唔會少得去邊，起碼仲有「蔡思貝如何經歷童年陰影」、「袁偉豪王君馨感情線」等等。
BTW，網民話如果楊明改為林峯、袁偉豪變成吳卓羲，會吸引啲！同意？
來源 source: http://nextplus.nextmedia.com
|
鍾意就快D Share啦！
|
|
|
