2019年5月30日 星期四

【勇氣剖白】醉駕偷食影裙底三宗罪 羅鈞滿:自己唔應該犯呢啲錯 __,羅鈞滿,

馬上成為壹會員會員專區只限會員閱讀會員註冊/登入藝員訓練班出身嘅羅鈞滿,11年拍《天與地》飾演少年版鼓佬而令觀眾留下印象。13年,參加《星夢傳奇》彈出 ...


馬上成為壹會員
會員專區 只限會員閱讀


藝員訓練班出身嘅羅鈞滿,11年拍《天與地》飾演少年版鼓佬而令觀眾留下印象。13年,參加《星夢傳奇》彈出,開始入屋。事業嶄露頭角,曾牽涉多宗交通事故的羅鈞滿於16年因醉駕鬧上法庭,又因偷食而與當時嘅新聞之花女友張文采分手,之後又被懷疑喺韓國夜場偷影女性裙底而被當地黑社會扣留。形象破產嘅羅鈞滿,17年決定同無綫提早解約,面對過往的錯,今日接受《蓋世寶訪問你》嚟個勇氣剖白。

蓋世寶見到羅鈞滿,好直接話佢離開TVB之前都真係難關重重,年青就會犯吓錯誤,第一宗罪係醉駕!羅鈞滿答:「其實我覺得自己唔應該犯呢啲錯,我覺得自己最錯嘅係醉駕,從來都唔會避忌講呢件事,因為有時都會借自己呢個情況去勸身邊朋友,飲咗酒就唔好揸車,又或者好似一個先驅咁,我覺得好慶幸係,嗰次經過警方路障,然後吹波仔證實超標,無牽涉人命,如果牽涉人命,自己點樣去面對傷者?呢件事情俾我好多體會、反省。同埋都好慶幸喺一件無牽涉人命傷亡嘅情況下,發生咗一件咁嘅事情,我覺得係一個好大嘅當頭棒喝。當然其實自己一向都會,如果知道要飲酒應酬就唔會揸車出去,但嗰次咁啱機緣巧合,導致最終做咗一件咁嘅事情,我覺得無藉口嘅,做咗就係做咗,我覺得呢個事情真係好唔啱。」

問完醉駕,蓋世寶帶出羅鈞滿嘅第二宗罪,感情唔誠實!羅鈞滿聽到,就答:「我覺得感情係兩個人嘅事情,相信大家都係講緊我以前嗰段感情,對方已經結婚,我又唔想講太多,影響佢而家嘅開心生活。但對我嚟講,報導上可能係話我去夜蒲、結識其他女仔,其實我以前都講過好多次,並唔係咁樣,對方係人哋女朋友,其他人走開晒,得番我哋兩個,所以個畫面就淨係見到我哋兩個。

咁第三宗罪,係報導當中仲有一項罪名,偷拍裙底,係真定假呢?羅鈞滿話:「梗係假啦,其實係好普通,以前做過一啲訪問,我唔知道喺韓國夜店入面影相,即係好普通嘅原來已經可以觸犯法例,當地律師問我,知唔知道之前有啲國內同胞,可能去梨花女子大學影一啲女生,或者去海灘偷影著比堅尼嘅女仔,如果你令對方覺得不安,其實對方已經有權申索。我嘅情況其實好奇怪,因為我第一次去韓國,咁啱有朋友去韓國公幹,同朋友去夜店玩吓,當時好多人,好少見到夜店有企滿兩三層嘅情況,所以就周圍影吓,唔知點解身邊有個我唔認識嘅韓國人,問我做咩喺度影相,然後叫咗我出店外傾。事後有啲韓國朋友話我知,其實對方只係想要錢,可能俾錢佢就已經搞掂,唔牽涉其他問題。但係我又唔識韓語,咁啱朋友又去咗洗手間,嗰一刻得番我一個人,變咗雞同鴨講,所以就搞咗好耐。」

聽到蓋世寶問自己係唔係接受咗大家對藝人做任何事情嘅反應,羅鈞滿話:「有啲人話食得鹹魚抵得渴,我唔係唔認同呢句說話,尤其而家嘅藝人,喺任何時刻都活喺鏡頭嘅情況下,其實都無可避免會被人挑好多細節出嚟。我記得之前有網民叫我膠水頭,話我gel到個頭好似膠水咁,我發覺又真係好似唔係幾好睇喎,所以就再無gel頭,唔好做膠水頭囉。

喺羅鈞滿身上發生過唔少事,其中網上瘋傳的一句「做人別太羅鈞滿」,唔知佢自己又點睇呢?「我覺得呢句可以算係經典啦。有好多㗎,嗰時有人話我義犬報恩,即係話我擦TVB鞋,最慘就係呢樣嘢,我完全無去擦TVB鞋嘅心,而俾人話你去擦TVB嘅鞋。其實好簡單,如果我要擦TVB鞋,我應該可以平步青雲,但我又唔覺得自己有幾平步青雲。而嗰句說話嘅感受的確好深,「做人別太羅鈞滿」,即係做人唔好好似羅鈞滿咁樣,大家就唔好好似我咁啦,做咁多令其他人有好大迴響嘅事情。」

對於因為自己嘅過錯而令事業走下坡,唔知羅鈞滿有冇真心後悔過?佢話:「我都會嘅,慢慢睇番,就係將自己以前訓練班,一路慢慢建立嘅嘢,因為我加入訓練班,當然想做主角啦,但心態唔係一定要做明星,我知道有啲同學一開始已經想做男主角,我覺得咁樣嗰段時間會好難捱,因為無辦法,訓練班出身就係要喺後排演警察、士兵,要企喺後排睇主角做戲。」已經洗底重新做人,大個仔嘅羅鈞滿,對自己同屋企人有咩承諾?「當然唔會再做一啲事情令佢哋傷心,我知道屋企人傷心,但佢哋唔會同我講,佢哋會好擔心,不過唔想再俾壓力我,所以無再話我、鬧我,同埋咁大個仔三十幾歲人,唔通仲鬧你咩?只能夠我一定會努力做落去,可能而家香港觀眾好少見到我,但其實一直都有拍攝、登台,能夠養活自己,希望可以俾番多啲家用,咁就係一件最好嘅事情。屋企人其實唔係因為你有俾家用而開心,而係見到你工作開心或者成功,覺得你終於成長。」

策劃:肥A

攝錄:黃志明、蕭敬漁

蓋世寶髮型及化妝:毛毛@嫁妝

羅鈞滿髮型:Rocky @ VULCAN 黨

立即下載APP,精彩內容壹手掌握

下載連結: http://bit.ly/Next29App

如對會員訂閱制遇到任何問題或意見,你可以致電 2623 9985,或電郵聯絡客戶服務主任cs@nextdigital.com.hk,我們定當盡力協助!


鍾意就快D Share啦!
Related Posts Plugin for WordPress, Blogger...