成功減肥入行順利
《開心速遞》裡面嘅細龍太身材惹火，好搶鏡。現實中，演活水性楊花角色嘅佢，係減肥烈女，入行前將170磅肉婆身材，減到變鋼條去選美。最近「細龍太」陳偉琪唔靠身材，靠才藝發圍。有讀者報料，話細龍太最近靜靜雞參加一個世界表演藝術錦標賽，仲贏咗金獎，成功殺入美國總選，下個月唔係愛回家，而係離家出走去荷里活，喺全美直播電視節目嘅決賽舞台，同世界幾千個對手片過。
放下藝人身段同素人一拚
28歲嘅細龍太陳偉琪，唔係得副身材冇料到。佢喺卑斯省大學讀政治，亦係豎琴同鋼琴八級高手。早排佢報名參加一個名為「WCOPA」世界表演藝術錦標賽，中港澳選拔一站，上星期就喺澳門舉行。
估唔到細龍太陳偉琪肯放低藝人身段，混喺一班索人參賽者之中
讀者報料話發現細龍太一口氣報咗四個item，包括戲劇， 模特兒，彈唱及樂器。陳偉琪唔係淨係識演細龍太嘅姣戲，有六年幕前經驗，當日係戲劇嗰PART，玩一人分飾四角，其中仲「曹總」上身。
贏兩金一銀
行catwalk又識以籃球look行搶鏡，表演樂器，更加無難度。結果嗰晚佢攞獎攞到手軟。喺呢個比賽網頁，睇到中港澳站初賽結果，細龍太憑戲劇同模特兒兩part贏咗金獎，成功進身七月喺美國荷里活舉行為期九日嘅總決賽。「細龍太」到時登上世界舞台，對住嘅再唔係細龍生，阿John，同大小姐，而係同幾千個世界對手鬥。 歌手茜拉曾參加
近年憑呢個比賽，踏上成名之路嘅，有之前同阿G.E.M參加內地騷《我是歌手》嘅馬來西亞歌手茜拉，同埋內地當紅唱作人金豆豆。讀者話當日係大贏家嘅細龍太，除咗兩金一銀，佢仲攞埋一個叫明日之星大獎，而呢個獎會獲得比賽嘅中港區主席，即音樂人林建華力捧，包括幫佢作曲及送佢一個MV。如果一個唔該俾喺總賽贏埋，咁細龍太真係衝出國際，仲邊得閒「回家」，見細龍生呀！
來源 source: http://nextplus.nextmedia.com
|
鍾意就快D Share啦！
|
|
|