民陣今日發起「反送中」大遊行，曾在89年六四上北京支持民運人士的導演張堅庭，今日亦有參加遊行。《蘋果》記者在灣仔路段遇上張堅庭，他接受訪問時表示在銅鑼灣插入遊行隊伍，而他又謂今次是繼2003年反對《23條》立法後，相隔16年再上街遊行。問到甚麼理由驅使上街，他說：「同香港人一樣，呢個條例修訂影響好深遠，成個經濟結構都有好大改變。」張堅庭又直言，今次出來遊行並非為了下一代：「我係為香港，下一代已經有自己嘅打算，我哋可以唔出嚟，但呢個地方咁大嘅挑戰時，我覺得要出嚟表達意見。」
至於秋後算賬？張堅庭則坦言不是活在別人的標準：「唔係我自己嘅問題，係人哋點睇你，秋後算賬有好多個層次，可能突然間將你提升到好嚴重、好大嘅一個history，可能覺得呢啲唔係有組織嘅我唔理佢住，我點知？我唔係為人哋標準生活。」被問到若然經過今次遊行，政府依然坐視不理，還可以做甚麼時？他說：「我估計政府都唔會聽，同2003年好唔同嘅係《23條》開始時候，中央政府仲未對香港咁強勢，佢哋仲有商量餘地，今次我諗好強勢，我睇唔到佢會有改變可能。」
問到今日有很多市民上街，是否覺得感動？張堅庭說：「唔會用感動呢個字，呢個係公民責任，你覺得呢度有問題就要表達，唔出聲就即係你接受咗，你接受咗第日有乜後果你咪要接受囉。」問他有沒有說話想對林鄭說？他擰頭說：「冇嘢同佢講，講唔到！我諗佢唔係同香港人負責，咁佢唔係同香港人負責又使乜同佢講？我同佢講嘢都冇意思。」
而他又預計，若惡法通過，香港只會繼續變差：「好簡單啲外資唔會嚟香港，以前有好多隱藏公司會嚟，之後就唔會，可能會去新加坡，冇錢嘅去台灣，如果呢啲外資嚟唔到香港，香港嘅問題就會慢慢出現，支撐到咁嘅樓價，一定要有金融行業，有咁嘅人工先可以支持到成個社會。」他又建議如果有兩層樓在手，可以將一層樓套現，保證有現金隨時可用。
至於修例引起移民話題，張堅庭就指身邊好多朋友已早有計劃：「唔係新一輪，我喺加拿大嘅朋友啲細路基本上已經返咗去，未有條例已經返咗去。一方面學校壓力大，非政治問題已經令好多人移民。唔好話加埋政治問題，淨係一個教育，讀國際學校兩個細路3萬，你去美加、澳紐係唔使錢，即係每個月多咗3萬，有時你賺都賺差唔多錢，樓價又可能平25%，份工可能唔係好多錢，但計計埋埋舒服好多，生活似個人。」
至於有甚麼想對香港人說？張堅庭說：「區選、議會裏面用嚟表達香港人點諗，如果你區選或者喺立法會冇乜進賬（議員人數），即係話接受未來個生活習慣，我覺得OK呀，你有權選擇，我覺得區選同立法會，就可以睇到香港人點諗。」
民陣6.9反惡法遊行
日期：6月9日（日）
集合地點：維園草地
時間：下午2時30分集合、3時正起步
遊行路線：維園草地遊行至金鐘添美道立法會
（資料來源：民陣）
------------------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX
--------------------------------
【記住63836568】全民爆相爆片！下一個爆料王就係你
https://bit.ly/2Guolu9
|
鍾意就快D Share啦！
|
|
|