直擊恒基地產（012）深水埗南昌一號「四房神則」現樓！3年前開賣的南昌一號上月底入伙，《蘋果》記者實測實用不足600方呎竟劏出4個房間的A單位，4個房間實用面積由約44呎至逾60呎，最細44呎房間堪稱細過囚室。業主何太話： 「只你要間房放得到一張床嘅話，多間房有咩唔好啫，咁佢又真係放得到一張床呀！ 」
南昌一號是單幢樓，一梯四伙，標準B及C室分別為實用面積364至367呎的兩房單位，標準D室實用面積417至418呎竟提供3房，但標準A室更絕，實用595呎竟劏四房。叫得神則，因為有限空間卻劏出比坊間較多房間，例如同系鴨脷洲倚南中層D室實用567呎為3房單位，而中層C室實用449呎為2房單位。
《蘋果》直擊一個高層A室，4個房間面積由44呎至逾60呎，主人房面積由約54呎方形空間與逾6呎衣櫃位組成，另加數呎開門位。遷就房門及套廁門，只能靠近窗邊擺床，由窗邊拉尺度到房門邊約4呎半，身高1.7米記者瞓低，頭頂腳下仍有餘位，就算不偷窗台仍可放雙人床，但窗台有兩個閘角又無法偷來做床位。
被主人房衣櫃位食去6平方呎凹位的細房，雖然面積約50呎，且比另外2個細房略大幾呎，但現場觀感卻是全屋最細一間房，相信由於無窗台，觀感完全比下去。該房又相連工作平台，遷就房門與平台門開關後，僅餘靠牆空間放置傢俬，但仍有3呎2吋乘6呎半，料夠放單人床，但僅餘一條數呎闊通道。
另外，2間細房面積均約44呎，睡床可橫可直，但兩房均2呎乘6呎半窗台，足夠偷位做床，亦令房間空間增加十多呎空間，現場睇落亦感闊落。全屋不足600呎，竟然間出4個房間，關鍵除了房細，還不設玄關，且開放式廚房，沒有獨立一個廚房，造成客飯廳合一約110呎，比較同系倚南2款3房客廳分別125呎及137呎，分別細15至27呎。
何太買上述單位前，已深明單位正是四房神則，「只你要間房放得到一張床嘅話，多間房有咩唔好啫，咁佢又真係放得到一張床呀！其實呀，香港有啲樓，床都放唔到有啲實呎二百幾呎嘅屋，佢啲床都要訂造㗎啦，咁而家我一樣訂造咪無問題囉！我睇過示範單位，無感覺到單位有乜嘢喎！細嘅樓，我都睇過，而家推出啲納米樓咪仲細。所以我唔買納米樓，買大間啲，方便租畀家庭客。納米樓，你可能年年搵經紀放租，因為租客覺得唔夠住，又要搬。如果有4間房，家庭客唔會住一、兩年，立亂搬屋。而家個單位我接受到，香港地，地少人多，你要一千幾百呎，都要睇下自己實力先得嘅。」她補充：「280幾呎，一廳2房咪仲細！」
這個四房神則單位是何太以近1,100萬元買入，支付兩成首期後，餘下8成由從事金融業的80後女兒來供，月供約3.7萬元，「無打算女兒還首期畀我，反正，自己手頭有啲空閒資金，咪等佢供下樓，做下業主，感受下囉！見呢度舊區重建，將來會更好，考慮目光要長遠。當時買又唔係話太貴。」近期中美貿易戰？「無驚過。我覺得香港嘅樓市，有買貴就無買錯，今年畀唔到你，或者跌咗落去，但佢始終都會畀返你。」
多年來鍾情投資磚頭，自認股市仍處於交學費階段，「自己又唔識睇，升嘅時候自己又唔識落車。好似幾年前買滙豐（005）60幾蚊買入，英國脫歐消息，跌到50蚊，買咗幾個月，輸幾萬蚊。咁輸少少啫，你唔俾返啲學費，又邊有教訓呢。但其實利息係幾好，不過自己唔夠膽買，賺咗又唔識放，以為仲有得升。股票，無乜興趣參與。」
「我而家呢層樓，如果放租收返3萬幾蚊，有返3厘息。當樓價每年升10%，十年後咪賺返本，又賺租金。」但97亞洲金融風暴、08年金融海嘯，本港樓市下跌，何太話：「就算樓市跌10%…20%…，10年後升返1倍畀你。而家等阿女去供樓，如果佢供唔起，我咪同佢供囉。（但你退休啦喎？）我仲有積蓄，預咗樓市逆轉嘅時候，幫佢供！」育有一子一女的她補充，自己的身家「將來咪又係佢哋嘅！」
至於上述四房神則的交樓質素優良，資深驗樓師賴達明驗收，主要是主人房套廁窗頂有一塊空心磚，其中一個房間外的玻璃窗邊膠有孔需要修補，14項工種有9項滿分，計及少許門邊刮花、修口罅、手柄鬆，單位驗樓評分96分。
記者：陳家雄
影片
採訪：陳家雄 張嘉鎣
編撰：張嘉鎣
攝影：細釗
剪接、後期：覃耀祥
編審：楊智佳
-----------------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX
| 恒地(012)深水埗南昌一號「四房神則」已入伙。 | | |
| | | |
|
鍾意就快D Share啦！
|
|
|
