本港3名資深法官早前匿名接受路透社訪問表達對「送中」惡法憂慮，回歸前後出任法律界議員18年的吳靄儀接受《蘋果》訪問，直指有關情況不尋常。「顯見法官嘅憂心係到咗極點」，她認為政府經常強調「送中」修例通過後，港人可以依靠「法官把關」，卻一直無視法官憂慮，只叫法官不應受訪，又拒絕與法律界選委會面，做法極為傲慢。「法律界話你有問題，佢（港府）就話法律界講廢話、唔識法律，作人身攻擊，而唔去面對批評啱定唔啱，呢個係好差的做法」，吳亦批評司局長「信譽破產」，特首林鄭月娥似乎無視反對聲之強烈，堅稱不少人支持修例，吳靄儀呼籲港人6.9上街力抗「食死貓」。
記者 林俊謙
早於《逃犯條例》修訂被外界稱為「送中」惡法之前，吳靄儀已經指出當中的問題，因為早在1998年她仍任立法會議員時，已經參與《逃犯條例》的審議。她憶述當年立法會因為張子強案而就《逃犯條例》進行討論，當時立法會認為，香港若要與大陸有任何逃犯移交，都必先有公平審訊的保障，「如果無就唔可以，立法會好堅持呢點。」由於北京政府一直未能接受上述要求，特區政府其後未再就修例提供任何新消息，中港法制「防火牆」得以保持。
吳靄儀坦言1998年討論過後，立法會都不時查詢政府的修例進展，但當局一直未有交代，卻突然於今年2月宣佈決定修例，她批評：「咁多年嚟，政府都係因為我哋（立法會）唔接受不公平審訊，所以唔移交（香港人到大陸受審），現時忽然間就話無問題，其實中間做過咩事呢？其實係無做過任何事，除咗20幾年後，將個保障（講成）變咗做個漏洞。」她直言：「我覺得呢件係我做立法會議員未了嘅事，所以1998年嘅檔案，我仍然放喺身邊，知道呢件事有一日會再來。」結果預言就在林鄭月娥任特首後成真，吳靄儀至今出席過解釋修例的論壇數目「多到數唔到」，看到巿民由初時冷漠，變成近日越來越明白修例之惡。
吳靄儀批評，港府現時修例的方法「邏輯上都講唔通」，「你為交（陳同佳）一個人去台灣，現在變咗全體（香港人）可以移交去大陸，呢種做法真係反智。」她指出，台灣當局早已表明不會按港府現時修例方式引渡陳同佳到台受審，並表明會支持陳在香港受審，再由台灣提供證據和協助，可惜港府充耳不聞，直斥：「（政務司司長）張建宗、（保安局局長）李家超同（律政司司長）鄭若驊，全部都係信譽破產嘅人。」
對於李家超辯稱內地政府接收香港的逃犯後，若然違反保障人權承諾，「所有人都會知道」。吳靄儀炮轟：「事實上，我哋大家現在就睇到囉！已經睇到大陸嗰套審訊，你可以失蹤、人間蒸發、家人見唔到你，律師會被人炒魷，然後再畀個律師你，你只可以認罪，仲要喺電視前公開認罪。喺呢段失蹤的時間，又有種種嘅虐待，呢啲咁嘅嘢，就係大家都睇到囉！王全璋係點樣、桂民海係點樣，大家都睇到囉！」
她批評政府至今拒絕將人權保障正式寫入法律，辯稱是要「保持靈活性」，那正是最令香港人擔心地方，「到時政府又話因為種種理由，不適宜要求呢啲（人權保障），咁我哋點？」質疑屆時政府不論如何跟進，都難令人相信有效，「人哋（大陸）個制度，點會因為你香港（移交）1個人改變？（李家超）呢個講法都只係氹住人先嘅啫。」
形容香港目前已處於危險關頭的吳靄儀認為，今次修例比《基本法》23條立法更嚴重，除令香港人權受損，更會因外國投資者對香港缺乏信心撤資下，直接打擊香港經濟和國際金融中心地位，對每個港人都有切身影響，所以港人必須上街表態，令國際社會明白港府今次修例並無任何認受性，「無論個效果係點，我哋都要做，唔可以畀林鄭話香港都無人反對吖，話呢條條例幾好吖，我哋唔可以食呢隻死貓！」
吳靄儀2002年與湯家驊等多名資深大律師合組「《基本法》23條關注組」，向巿民解說23條惡法問題，間接促成23條惡法被拉倒，之後更於2006年一同創立公民黨。17年過去，已退黨的湯家驊現為特首林鄭月娥政府的行政會議成員，近日不斷為「送中」修例辯護，吳靄儀指「人各有志」，重提當年反對23條時，她說湯家驊有很大功勞，「如果當時少咗湯家驊，我諗我哋唔會做到咁多嘢。所以一個人後來變成點，呢個係後來嘅事。佢（湯家驊）當時的確做過嘅嘢，我哋唔可以當佢無做過」。
對於湯家驊支持「送中」惡法的論據，吳靄儀據理力爭，「時至今日，佢（湯）講嘅說話，已經無任何說服力㗎嘞！」吳特別指出，湯家驊早前為撐修例而稱「洗頭艇合法化」的論調，實在令人譁然，「即係等於你話將強姦打劫合法化，就令人唔使做呢啲嘢，咁係講唔通。呢個（說法）只係會傷害佢自己嘅公信力，而唔會幫到政府任何一方面囉。」
民陣6.9反惡法遊行
日期：6月9日（日）
集合地點：維園草地
時間：下午2時30分集合、3時正起步
遊行路線：維園草地遊行至金鐘添美道立法會
（資料來源：民陣）
-----------------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX
| 吳靄儀指法官憂心已到極點，重申中港需要防火牆。易仰民攝 | |
|
鍾意就快D Share啦！
|
|
|
