森美趁去咗英國讀書嘅大仔曦樂放暑假，之前一家去咗新西蘭玩，就算返香港，依然抽時間陪家人，係廿四孝老豆。
一對仔女，森美一向比較擔心大仔學業，事閞細女懂得自律，成績又好。反之兒子曦樂在港讀書時嘅成績麻麻。不過最近呢個爸爸終於放下心頭大石，兒子曦樂去咗英國讀書後，個人成熟咗，且成績突飛猛進，考試考到11科A*嘅超班水準，作為爸爸嘅森美當然好開心！
原來今年16歲嘅兒子曦樂，成績大躍進，森美話全賴老婆功勞。老婆為咗睇住個仔，專登飛去英國陪佢讀書，有家人鼓勵下，兒子終於喺學業上突破考到11個A*。
森美同老婆Veronica結婚19年，佢一直都感激老婆喺佢最艱難時間撐住。森美最近講番，佢之前因因家族遺傳及自我要求過高，搞到患上抑鬱、社交恐懼及障礙，喺嗰5、6年嘅日子，全靠老婆容忍佢，湊大一對仔女，所以，仔女有今日嘅成績，都係老婆嘅功勞。森美諗番當年有病嘅佢，成日黑面、挑剔，搞到老婆都要承受好大壓力，好彩老婆天生樂觀，唔會嬲佢，所以森美好感激老婆，「佢陪我一齊捱，好辛苦！」抗病呢段日子，森美日日都要提醒自己要快樂，加上佢有食藥同行為治療，而家已經好番，唔使食藥。森美大哥，你睇吓，你有對仔女，有個好老婆，一家四口食吓燒賣、雞蛋仔，已經令你笑逐顏開，快樂真係好簡單，係唔係咁話先？
呢日見到森美急急步咁，搞咩呢？行到去時代廣場，森美企埋一角，雙眼碌到大一大，似係等人！森美口擘擘，笑晒口咁，仲有人餵食燒賣添，咁鬼sweet，原來係森美嫂Veronica，同行仲有埋一對仔女，森美個口未食完粒燒賣，隻手已經拎緊阿女手上袋雞蛋仔嚟食，好有胃口！一家四口食住雞蛋仔行過時代廣場，見到有龍珠擺設，最興奮嘅竟然係森美嫂，咁又係，龍珠話晒都係佢同森美嘅那些年回憶。大仔好醒，知媽咪好想行去影相，但係又有啲老尷，最後佢索性推媽咪行過去，仲幫佢影相。本來喺旁邊齋睇嘅森美，睇睇吓忍唔住出手，龍友上身咁幫老婆影靚相。一家四口，好開心咁行去攞車，快樂就係咁簡單。
攝錄：東尼
|
鍾意就快D Share啦！
|
|
|
